اسلام آباد: وزیراعظم محمد شہباز شریف نے وزیراعظم ہاؤس میں ٹرائی نیشن سیریز میں شریک پاکستان، سری لنکا اور زمبابوے کی کرکٹ ٹیموں کے اعزاز میں خصوصی ظہرانہ دیا۔
وزیراعظم نے کہا کہ تینوں ممالک کی ٹیموں نے سیریز میں جس جذبے، مہارت اور لگن کا مظاہرہ کیا وہ انتہائی قابلِ ستائش ہے۔ تمام کھلاڑی اپنے اپنے ملک کی بہترین نمائندگی کر رہے ہیں۔
انہوں نے اس خواہش کا اظہار کیا کہ میچز کے دوران کھلاڑی اسپورٹس مین اسپرٹ اور باہمی احترام کی ایسی مثال قائم کریں جو نوجوان نسل کے لیے مشعلِ راہ ثابت ہو۔
وزیراعظم نے پی سی بی کی کارکردگی کی تعریف کرتے ہوئے کہا کہ چیئرمین محسن نقوی کی سربراہی میں بورڈ نے سیریز کے تمام میچوں کے لیے بہترین انتظامات، مؤثر حکمتِ عملی اور اعلیٰ پیشہ ورانہ مہارت کا مظاہرہ کیا۔
وزیراعظم نے کہا کہ پاکستان میں انٹرنیشنل کرکٹ کا مسلسل انعقاد ملکی مثبت تشخص اور امن و استحکام کا ثبوت ہے۔ ٹرائی نیشن سیریز سے شائقین کو اعلیٰ درجے کا کرکٹ دیکھنے کا موقع مل رہا ہے۔
انہوں نے امید ظاہر کی کہ سیریز کے ذریعے پاکستان، سری لنکا اور زمبابوے کے درمیان دوستی اور باہمی تعاون مزید مضبوط ہوگا اور پاکستان مستقبل میں بھی دنیا بھر کی ٹیموں کی میزبانی جاری رکھے گا۔
ظہرانے میں وزیراعلیٰ سندھ سید مراد علی شاہ، وزیر داخلہ و چیئرمین پی سی بی سید محسن رضا نقوی، وفاقی وزرا عطا اللہ تارڑ و حنیف عباسی، سری لنکن ہائی کمشنر ریئر ایڈمرل فریڈ سینیویراتھنے اور زمبابوے کے ہائی کمشنر ٹائیٹس ابو بسوتو نے بھی شرکت کی۔
