اسلام آباد: وفاقی وزیر علی پرویز ملک نے چینی سفیر جیانگ زائدونگ سے چینی سفارت خانے میں ملاقات کی۔ اس ملاقات میں دونوں ممالک کے درمیان اسٹریٹجیک تعلقات، توانائی اور معدنیات کے شعبے میں تعاون پر تفصیل سے تبادلہ خیال کیا گیا۔
چینی سفیر نے کہا کہ چین پاکستانی عوام کی معاشی ترقی کے لیے اپنا تعاون جاری رکھے گا اور دونوں ممالک کے تعلقات کو مزید مستحکم کرنے کے لیے بھرپور کوششیں کی جائیں گی۔ انہوں نے مزید کہا کہ پاکستان اور چین کے درمیان کان کنی کا شعبہ بہت اہم ہے اور چینی کمپنیاں جیسے ایم سی سی اور سی ناک پاکستان میں اس شعبے میں کام کر رہی ہیں۔ اس کے علاوہ، سیندک اور سیادک منرل منصوبے چین کے پاکستان کے معدنی شعبے میں اہم پروجیکٹس ہیں۔
وفاقی وزیر علی پرویز ملک نے چینی سفیر کو آئندہ پاکستان منرل انویسٹمنٹ فورم 2026 کی خصوصی دعوت دی۔ چینی سفیر نے اس موقع پر کہا کہ وہ اپنے متعلقہ اداروں کے سربراہوں کو پاکستان منرل انویسٹمنٹ فورم میں شرکت کی ترغیب دیں گے۔
وفاقی وزیر نے اس موقع پر کہا کہ پاکستان چین کی خودمختاری اور سالمیت کی مکمل حمایت کرتا ہے، اور دونوں ممالک کے درمیان تعاون مزید مضبوط ہوگا۔
Read More..
