شہری دباؤ پر کوئٹہ کی سڑکیں کھل گئیں
سوشل میڈیا پر شہریوں کی جانب سے شدید تنقید اور بھرپور آواز اٹھائے جانے کے بعد شہر کے اہم علاقوں سے سیکورٹی کے نام پر لگائی گئی رکاوٹیں ہٹا دی گئیں۔
انتظامیہ نے انسکمب روڈ، جعفر جمالی روڈ، پرنس روڈ، افغان سفارتخانے کے اطراف اور دیگر مقامات سے رکاوٹیں ختم کرتے ہوئے ٹریفک کی روانی بحال کر دی۔ شہریوں نے گزشتہ کئی دنوں سے سوشل میڈیا پلیٹ فارمز پر احتجاج کیا تھا کہ اہم شاہراہوں کی بندش سے روزمرہ زندگی مفلوج ہو کر رہ گئی ہے، ایمبولینسوں کی آمدورفت متاثر ہو رہی ہے جبکہ دفاتر، تعلیمی اداروں اور کاروباری مقامات تک پہنچنا مشکل ہو چکا ہے۔
شہریوں کے مسلسل مطالبے کے بعد ضلعی انتظامیہ اور متعلقہ اداروں نے صورتحال کا جائزہ لے کر رکاوٹیں ختم کرنے کا فیصلہ کیا۔ رکاوٹیں ہٹائے جانے کے بعد ٹریفک معمول کے مطابق رواں دواں ہے اور شہریوں نے اس اقدام کو خوش آئند قرار دیتے ہوئے اسے عوامی آواز کی کامیابی قرار دیا۔
شہری حلقوں نے مطالبہ کیا ہے کہ آئندہ سیکورٹی اقدامات کے نام پر اہم شاہراہوں کی بندش سے پہلے عوامی سہولت کو مدنظر رکھا جائے تاکہ شہریوں کو غیر ضروری مشکلات کا سامنا نہ کرنا پڑے۔
