وفاقی وزیر برائے بحری امور محمد جنید انوار چوہدری نے اعلان کیا ہے کہ پاکستان میں بنکرنگ کے لیے تاریخ کا پہلا لائسنس جاری کر دیا گیا ہے۔ کراچی پورٹ پر پہلی عالمی معیار کی بنکرنگ سروس کا آغاز بھی کر دیا گیا ہے، جس میں متعدد بین الاقوامی کمپنیوں نے لائسنس کے لیے دلچسپی ظاہر کی ہے۔
وزیر کے مطابق یہ سروس وزیراعظم کی خصوصی ہدایات پر شروع کی گئی ہے اور اس کے ذریعے جہازوں کو بین الاقوامی معیار کا فیول سپلائی نظام فراہم کیا جائے گا۔ عالمی معیار کی بنکرنگ سے نہ صرف کراچی پورٹ کی علاقائی مسابقت بڑھے گی بلکہ غیرملکی شپنگ لائنز کی آمد میں اضافہ ہوگا اور آپریشنز سے قیمتی زرمبادلہ حاصل ہوگا۔
جنید انوار چوہدری نے بتایا کہ کراچی پورٹ میں عالمی حفاظتی اور آپریشنل اسٹینڈرڈز نافذ کر دیے گئے ہیں، اور نئی سروس سے مرمت، سپلائز اور میری ٹائم لاجسٹکس کے شعبوں میں روزگار کے مواقع بھی بڑھیں گے۔ ایندھن کے معیار، دستاویزات اور شفافیت پر عالمی اصولوں کی مکمل پابندی کی جائے گی۔
اس اقدام سے مستقبل میں پورٹس سے اربوں روپے کی آمدنی متوقع ہے۔
