بلوچستان کے صوبائی دارالحکومت سمیت بیشتر اضلاع میں موبائل انٹرنیٹ سروس کی بندش مزید دو روز کے لیے بڑھا دی گئی ہے، جس کے بعد 3جی اور 4جی سروس 18 نومبر تک معطل رہے گی۔
ایڈیشنل چیف سیکرٹری داخلہ حمزہ شفقت نے بتایا کہ سیکیورٹی خدشات میں مسلسل اضافے کے باعث یہ فیصلہ کیا گیا ہے، جبکہ سیکیورٹی اداروں کی سفارش پر بندش میں مزید توسیع کا امکان بھی موجود ہے۔
واضح رہے کہ موبائل انٹرنیٹ سروس 10 نومبر سے معطل ہے، جسے پہلے 16 نومبر تک بند رکھنے کا فیصلہ کیا گیا تھا، تاہم موجودہ حالات کے باعث اس میں اضافہ کر دیا گیا ہے۔
طویل بندش کے سبب شہریوں، آن لائن کاروبار کرنے والوں، فوڈ ڈلیوری رائیڈرز، طلبا اور صحافیوں کو شدید مشکلات کا سامنا ہے، جبکہ انٹرنیٹ کی عدم فراہمی پر عوامی سطح پر شدید تشویش کا اظہار کیا جا رہا ہے۔
بلوچستان میں موبائل انٹرنیٹ معطل، شہریوں کی زندگی متاثر
کوئٹہ سمیت بلوچستان کے مختلف اضلاع میں موبائل انٹرنیٹ کی معطلی نے روزمرہ زندگی کو شدید متاثر کر دیا ہے۔ سیکیورٹی خدشات کے پیش نظر کی گئی یہ بندش شہریوں کے لیے متعدد چیلنجز پیدا کر رہی ہے، کیونکہ انہیں ضروری آن لائن خدمات تک رسائی میں دشواری ہو رہی ہے۔
موبائل ڈیٹا کی عدم دستیابی کے باعث سوشل میڈیا پلیٹ فارمز، وائس کمیونی کیشن ایپس اور دیگر ڈیجیٹل خدمات ناقابل رسائی ہو گئی ہیں۔ اس رکاوٹ نے آن لائن کاروبار اور ڈیجیٹل ادائیگیوں پر انحصار کرنے والے افراد کے لیے معمول کی سرگرمیاں پیچیدہ بنا دی ہیں اور شہریوں کو شدید مشکلات کا سامنا کرنا پڑ رہا ہے۔
