پاکستان اور قطر کے تعلقات میں اقتصادی و دفاعی تعاون کا نیا دور شروع
پاکستان اور قطر کے درمیان اقتصادی، دفاعی اور زرعی شعبوں میں تعاون کے نئے دور کا باضابطہ آغاز ہو گیا ہے۔ یہ پیش رفت اسپیشل انویسٹمنٹ فسیلیٹیشن کونسل (SIFC) کی کوششوں کا نتیجہ ہے، جس کا مقصد دو طرفہ تعلقات کو مضبوط بنانا، سرمایہ کاری بڑھانا اور جدید ٹیکنالوجی کا تبادلہ فروغ دینا ہے۔
دوحہ میں صدرِ پاکستان آصف علی زرداری اور قطر کے نائب وزیراعظم و وزیرِ دفاع شیخ سعود کے درمیان اہم ملاقات ہوئی، جس میں دفاعی شعبے، زراعت اور سرمایہ کاری میں تعاون مزید بڑھانے پر اتفاق کیا گیا۔
ملاقات میں مشترکہ فوجی مشقوں، دفاعی ٹیکنالوجی کے تبادلے اور عسکری مہارت میں اضافے کے لیے نئے اقدامات پر زور دیا گیا۔ قطر کے وزیرِ دفاع نے پاکستان کی مسلح افواج کی پیشہ ورانہ صلاحیتوں کو سراہتے ہوئے دفاعی تعاون میں گہری دلچسپی کا اظہار کیا۔
تجزیہ کاروں کے مطابق دونوں ممالک کے درمیان بڑھتے ہوئے تعلقات نہ صرف دفاعی صنعت اور برآمدات کو وسعت دیں گے بلکہ جدید ٹیکنالوجی، زرعی پیداوار اور سرمایہ کاری کے نئے مواقع بھی پیدا ہوں گے۔ اس سلسلے میں ایس آئی ایف سی پاکستان کی اقتصادی، زرعی اور دفاعی ترقی میں کلیدی کردار ادا کر رہی ہے۔
