حکومت 27 ویں آئینی ترمیم میں اضافی ترامیم پیش کرنے کی تیاری
حکومت کی جانب سے 27 ویں آئینی ترمیمی بل میں اضافی ترامیم شامل کرنے کا امکان ہے۔رپورٹس کے مطابق یہ اضافی ترامیم پہلے قومی اسمبلی میں پیش کی جائیں گی، اور حکومت و اپوزیشن کی ترامیم کی علیحدہ فہرستیں موجود ہیں۔ قومی اسمبلی سے منظوری کے بعد بل دوبارہ سینیٹ کو بھجوایا جائے گا۔
حکومتی ذرائع نے تصدیق کی ہے کہ 27 ویں آئینی ترمیم میں مزید ترامیم لائی جائیں گی، جبکہ اپوزیشن کی گیارہ ترامیم بھی ایجنڈے میں شامل ہیں۔ نئی ترامیم پیش کرنے سے قبل وفاقی کابینہ سے منظوری بھی لی جائے گی۔
واضح رہے کہ دو روز قبل سینیٹ نے دو تہائی اکثریت سے 27 ویں آئینی ترمیم کی منظوری دے دی تھی۔ وزیر قانون اعظم نذیر تارڑ نے بل پیش کیا، جس کی حمایت میں 64 ارکان نے نشستوں پر کھڑے ہو کر ووٹ دیا، جن میں پی ٹی آئی کے سینیٹر سیف اللہ ابڑو اور جے یو آئی کے احمد خان بھی شامل تھے۔
تاہم باقی ارکان نے آئینی ترمیم کے خلاف احتجاج کرتے ہوئے اجلاس کی کارروائی کا بائیکاٹ کیا اور ایوان سے واک آؤٹ کیا۔
