پاک افغان مذاکرات میں ڈیڈلاک ختم کرنے کے لیے ترکی کے صدر رجب طیب اردوان نے اہم وزرا کو پاکستان بھیجنے کا اعلان کیا ہے۔ ترک خبر رساں ایجنسی کے مطابق وفد اسی ہفتے پاکستان پہنچے گا اور متعلقہ حکام سے بات چیت کرے گا۔
پاکستان اور افغان طالبان کے درمیان مذاکرات میں ڈیڈلاک ختم کرنے کے لیے ترکی ایک بار پھر ثالثی کی کوشش کر رہا ہے۔ ترک صدر نے اپنے وزیر خارجہ، وزیر دفاع اور انٹیلی جنس چیف کو دورے پر بھیجنے کا اعلان کیا ہے۔
سفارتی ذرائع کے مطابق پاکستانی حکام اور ترک حکام دورے کی تاریخ ایک دو روز میں طے کریں گے۔ دورے کا مقصد فریقین کے درمیان پاک افغان فائر بندی کو حتمی شکل دینا اور پائیدار امن قائم کرنا ہے۔
برطانوی خبر رساں ادارے کے مطابق ترک صدر نے وفد کے پاکستان دورے کا اعلان باکو سے واپسی کے بعد وزیراعظم شہباز شریف سے مشاورت کے بعد کیا۔ پاکستان اور افغانستان کے درمیان سرحدی تنازعات کے حل کے لیے پہلے قطر اور پھر ترکی میں کئی مذاکرات ہو چکے ہیں، تاہم افغان طالبان کی جانب سے تحریری ضمانت نہ دینے کی وجہ سے مذاکرات بغیر نتیجہ ختم ہو گئے۔
