بلوچستان کے مختلف اضلاع میں 5 شدت کا زلزلہ، شہری خوفزدہ
بلوچستان کے مختلف اضلاع میں رات گئے زلزلے کے شدید جھٹکے محسوس کیے گئے، جس سے شہریوں میں خوف و ہراس پھیل گیا۔ زلزلہ پیما مرکز کے مطابق زلزلے کی شدت ریکٹر اسکیل پر 5.0 ریکارڈ کی گئی، جبکہ اس کا مرکز صوبے کے پہاڑی علاقے کے قریب تھا۔
اطلاعات کے مطابق زلزلہ رات 2 بج کر 45 منٹ پر آیا، جس کے جھٹکے زیارت، ہرنائی، زردالو، کھوسٹ، شاہرگ، مسلم باغ، خانوزئی، کان مہترزئی، رود ملازئی اور سرخاب سمیت متعدد علاقوں میں محسوس کیے گئے۔ زلزلے کے دوران شہری گھروں سے باہر نکل آئے اور کلمہ طیبہ کا ورد کرتے رہے۔
صوبائی دارالحکومت کوئٹہ کے بعض علاقوں میں بھی ہلکے جھٹکے محسوس کیے گئے، تاہم خوش قسمتی سے کسی جانی یا مالی نقصان کی اطلاع موصول نہیں ہوئی۔
محکمۂ موسمیات کے مطابق زلزلے کی گہرائی تقریباً 10 کلومیٹر تھی، جو سطح زمین کے قریب ہونے کے باعث کئی اضلاع میں نمایاں طور پر محسوس کی گئی۔ ریسکیو اداروں کو ہنگامی صورتحال سے نمٹنے کے لیے الرٹ رہنے کی ہدایت جاری کر دی گئی ہے۔
