صدر مملکت آصف علی زرداری نے دوحا میں امیرِ قطر شیخ تمیم بن حمد الثانی سے اہم ملاقات کی۔ اس موقع پر شیخ تمیم نے اعلان کیا کہ وہ آئندہ سال کے اوائل میں پاکستان کا دورہ کریں گے۔
شیخ تمیم نے کہا کہ قطر کو پاکستان اور اس کی کامیابیوں پر فخر ہے۔ انہوں نے پاکستانی کمیونٹی کی خدمات کو سراہتے ہوئے کہا کہ وہ چاہتے ہیں کہ کمیونٹی کی تعداد میں خاطر خواہ اضافہ ہو۔
صدر زرداری نے امیرِ قطر کو حکومت اور عوام کی جانب سے نیک تمناؤں کا پیغام پہنچایا اور دونوں رہنماؤں نے تاریخی اور برادرانہ تعلقات کو مزید مضبوط بنانے کا عزم ظاہر کیا۔ صدر زرداری نے قطر کی ترقی اور امیرِ قطر کی بصیرت افروز قیادت کی بھی تعریف کی۔
امیرِ قطر نے پاکستان-سعودی عرب دفاعی معاہدے کو خوش آئند اور بروقت قرار دیتے ہوئے کہا کہ پاکستان منفرد حیثیت رکھتا ہے جو چین، مغرب اور خلیجی ممالک سے بیک وقت تعلقات رکھتا ہے۔
صدر زرداری نے دونوں ممالک کے درمیان دفاع، دفاعی پیداوار، زراعت اور غذائی تحفظ میں تعاون بڑھانے کی تجویز دی، جس پر امیرِ قطر نے فوری رابطوں کی ہدایت کی۔
صدر زرداری نے قطر میں مذاکرات کی میزبانی اور افغانستان سے متعلق کردار کی تعریف کی۔ امیرِ قطر نے امید ظاہر کی کہ پاکستان اور افغانستان موجودہ مسائل حل کرکے حالیہ چیلنجز کو پسِ پشت ڈال دیں گے اور پاکستان کے دورے کے لیے دعوت قبول کی۔
ملاقات میں چیئرمین پیپلز پارٹی بلاول بھٹو زرداری اور پاکستانی سفیر بھی موجود تھے۔
