آج بابا گرو نانک دیو جی کا 556واں جنم دن منایا جا رہا ہے۔ اس موقع پر صدرِ مملکت آصف علی زرداری نے سکھ برادری کو دلی مبارکباد پیش کی ہے۔
صدرِ مملکت نے اپنے پیغام میں کہا کہ بابا گرو نانک دیو جی امن، رواداری اور مساوات کے پیامبر تھے۔ ان کی تعلیمات انسانیت، محبت اور خدمتِ خلق کا درس دیتی ہیں — ایک ایسا پیغام جو آج بھی عالمی سطح پر رہنمائی فراہم کر رہا ہے۔
بابا گرو نانک کا پیغام ،بابا گرو نانک دیو جی، امن، رواداری اور انسانیت کے پیامبر انسانیت کے لیے روشنی
بابا گرو نانک نے ہمیشہ انسانوں کے درمیان فرق مٹانے اور سب کے لیے برابری کا پیغام دیا۔ ان کا فلسفہ یہی تھا کہ انسانیت سب سے بڑی عبادت ہے۔
صدر زرداری نے کہا کہ پاکستان کو فخر ہے کہ وہ بابا گرو نانک کے مقدس گردواروں کا محافظ ہے۔گردوارہ جنم استھان ننکانہ صاحب سکھ برادری کے لیے روحانی مرکز کی حیثیت رکھتا ہے۔
صدرِ مملکت نے اس بات پر زور دیا کہ پاکستان نے کرتارپور راہداری کے ذریعے دنیا بھر سے آنے والے سکھ یاتریوں کے لیے آسان رسائی ممکن بنائی ہے۔
یہ راہداری نہ صرف مذہبی آزادی کی علامت ہے بلکہ بین المذاہب ہم آہنگی کی بہترین مثال بھی ہے۔
صدر زرداری نے کہا کہ پاکستان اقلیتوں کے حقوق کے تحفظ اور مذہبی مقامات کی حفاظت کے لیے پُرعزم ہے۔انہوں نے دنیا بھر سے آنے والے سکھ یاتریوں کو خوش آمدید کہا اور کہا کہ بابا گرو نانک کا پیغام ایک پُرامن اور ہم آہنگ معاشرے کی تشکیل کا رہنما ہے۔
