صدرِ پاکستان آصف علی زرداری اور جمہوریہ عراق کے صدر ڈاکٹر عبداللطیف جمال راشد نے پاکستان اور عراق کے درمیان برادرانہ تعلقات کو مزید مضبوط بنانے کے عزم کا اعادہ کیا۔ دونوں رہنماؤں کی ملاقات دوحہ، قطر میں منعقدہ “دوسری عالمی سماجی ترقی کانفرنس” کے موقع پر ہوئی۔
صدراتی سیکرٹریٹ کے پریس ونگ کے مطابق ملاقات میں دوطرفہ تعلقات کے تمام پہلوؤں پر بات چیت کی گئی، بالخصوص تجارت، سرمایہ کاری اور عوامی روابط کو فروغ دینے پر زور دیا گیا۔ دونوں ممالک کے صدور نے کاروباری روابط بڑھانے اور ویزا سہولیات میں نرمی کے ذریعے معاشی تعلقات کو وسعت دینے کی ضرورت پر اتفاق کیا۔
صدر زرداری نے پاکستانی زائرین کی سہولت کے لیے عراق کے تعاون کو سراہا اور عراق میں مقیم پاکستانی برادری کی خدمات کو دونوں ممالک کے درمیان دوستی کا پُل قرار دیا۔
دونوں رہنماؤں نے خطے میں امن، استحکام اور باہمی تعاون کے فروغ پر بھی گفتگو کی اور طے پایا کہ اعلیٰ سطحی رابطے جاری رکھے جائیں گے تاکہ دوطرفہ تعلقات کو مزید فروغ دیا جا سکے۔
اس موقع پر خاتونِ اول بی بی آصفہ بھٹو زرداری، چیئرمین پیپلز پارٹی بلاول بھٹو زرداری اور پاکستان کے سفیر برائے قطر بھی موجود تھے۔
عراقی صدر نے صدر آصف علی زرداری کو ایک مرتبہ پھر عراق کے سرکاری دورے کی دعوت دی، جسے صدر زرداری نے قبول کرتے ہوئے کہا کہ وہ عراق کا دورہ رواں ماہ عراقی پارلیمانی انتخابات کے بعد کریں گے۔
