محکمہ موسمیات نے رواں ہفتے کے دوران ملک کے بالائی علاقوں میں تیز ہواؤں، بارشوں اور برفباری کی پیشگوئی کی ہے۔
محکمہ کے مطابق 4 نومبر سے مغربی ہواؤں کا نیا سلسلہ ملک کے شمالی حصوں میں داخل ہوگا، جو 5 نومبر تک وقفے وقفے سے بارش اور برفباری کا باعث بنے گا۔
ترجمان کے مطابق اس دوران چترال، دیر، سوات، کوہستان، ایبٹ آباد اور ہری پور میں بارش جبکہ بلند پہاڑی علاقوں میں برفباری کا امکان ہے۔ اسی طرح صوابی، پشاور، مردان، کوہاٹ، کشمیر اور مظفرآباد میں بھی بارش اور برفباری متوقع ہے۔
مزید بتایا گیا کہ اسلام آباد، راولپنڈی، مری، اٹک، چکوال، تلہ گنگ، جہلم اور سرگودھا سمیت خوشاب، گوجرانوالہ، سیالکوٹ، ناروال اور لاہور میں بھی گرج چمک کے ساتھ بارش ہونے کا امکان ہے۔
محکمہ موسمیات کا کہنا ہے کہ بارشوں کے دوران درجہ حرارت میں نمایاں کمی واقع ہوگی، جبکہ اسموگ اور دھند میں کمی آنے کی بھی توقع ہے۔
