اسلام آباد: وفاقی حکومت کی 27 ویں آئینی ترمیم کا مجوزہ مسودہ سامنے آگیا ہے، جس میں بتایا گیا ہے کہ آئین کے کون سے آرٹیکل میں ترامیم کی جائیں گی۔
ذرائع کے مطابق، مجوزہ ترمیم میں آئین کے کئی آرٹیکلز میں تبدیلی کی تجویز شامل ہے، جن میں آرٹیکل 160 (شق 3A)، آرٹیکل 213، آرٹیکل 243 اور آرٹیکل 191A شامل ہیں۔
اہم تجاویز:
آرٹیکل 160 (شق 3A):
حکومت کا منصوبہ ہے کہ شق 3A کو ختم کیا جائے، جو نیشنل فنانس کمیشن (این ایف سی) ایوارڈ سے متعلق ہے۔
ترمیم کے ذریعے این ایف سی کے فارمولے پر وفاقی اختیارات میں اضافہ کرنے کی تجویز ہے۔
آرٹیکل 213:
تجویز ہے کہ چیف الیکشن کمشنر کی تعیناتی کے طریقہ کار میں تبدیلی کی جائے۔
آرٹیکل 191A:
حکومت چاہتی ہے کہ آرٹیکل 191A ختم کرکے نیا آرٹیکل شامل کیا جائے، جس سے آئینی عدالتوں کے قیام کی راہ ہموار ہوگی۔
آرٹیکل 243:
اس میں تبدیلی کے ذریعے یہ واضح کیا جائے گا کہ مسلح افواج سول یا وفاقی حکومت کے ماتحت ہوں گی۔
18ویں ترمیم کے شیڈول 2 اور 3:
تجویز ہے کہ تعلیم اور آبادی جیسے مضامین دوبارہ وفاقی دائرہ اختیار میں شامل کیے جائیں۔
آرٹیکل 200:
تجویز کردہ ترمیم ججز کی ٹرانسفر سے متعلق ہے۔
ذرائع کے مطابق، وفاقی حکومت نے 27 ویں آئینی ترمیم کا مسودہ پیپلزپارٹی (PPP) کو بھیج دیا ہے، اور اتحادی جماعتوں سے مشاورت مکمل کرنے کے بعد حتمی مسودہ پارلیمنٹ میں پیش کیا جائے گا۔
