اسلام آباد (ویب ڈیسک) ملک کے مختلف شہروں میں چینی کی سرکاری قیمت پر عدم دستیابی برقرار ہے اور اوپن مارکیٹ میں فی کلو قیمت 210 روپے تک جا پہنچی ہے۔
رپورٹ کے مطابق لاہور اور پشاور میں چینی 190 سے 210 روپے فی کلو میں فروخت ہو رہی ہے، جب کہ کوئٹہ میں پرچون قیمت 185 روپے اور ہول سیل ریٹ 180 روپے فی کلو ہے۔ راولپنڈی میں سرکار کی مقرر کردہ قیمت 179 روپے فی کلو ہے، مگر دکاندار 181 سے 185 روپے فی کلو میں چینی بیچنے پر مجبور ہیں۔
صدر کریانہ ایسوسی ایشن راولپنڈی سلیم پرویز بٹ نے کہا کہ حکومت کی مقرر کردہ قیمت پر چینی کی فروخت ممکن نہیں، کیونکہ سرکاری سپلائی ناکافی ہے۔ انہوں نے بتایا کہ “پرچون فروش 185 روپے فی کلو پر بھی بمشکل چینی فروخت کرتے ہیں، لیکن پیرا فورس سرکاری نرخ سے زائد قیمت پر جرمانے عائد کر رہی ہے۔”
سلیم پرویز بٹ نے خبردار کیا کہ اگر چینی کی سپلائی ضرورت کے مطابق بحال نہیں کی گئی تو کریانہ فروش چینی کی فروخت بند کرنے پر مجبور ہو جائیں گے۔
