ترکی میں پاکستان اور افغانستان کے مذاکرات بے نتیجہ ختم
استنبول: پاکستان اور افغانستان کے درمیان دو روزہ مذاکرات ترکی میں بغیر کسی حتمی نتیجے کے اختتام پذیر ہوگئے۔ دونوں ممالک کے وفود نے سرحدی سلامتی، دہشتگردی کے خاتمے اور باہمی تعاون جیسے اہم امور پر تفصیلی بات چیت کی، تاہم کسی معاہدے یا مشترکہ اعلامیے پر اتفاق نہ ہو سکا۔
ذرائع کے مطابق مذاکرات کے دوران پاکستان نے افغان سرزمین سے سرگرم دہشتگرد گروہوں کے خلاف مؤثر کارروائی کا مطالبہ کیا، جب کہ افغان وفد نے بارڈر مینجمنٹ اور تجارت میں سہولتوں کے اضافے پر زور دیا۔
پاکستانی وفد کی قیادت اعلیٰ سفارتی حکام نے کی، جبکہ افغان وفد میں طالبان حکومت کے سینیئر نمائندے شامل تھے۔ مذاکرات میں ترکیہ کے حکام بطور میزبان اور مبصر شریک رہے۔
سفارتی ذرائع کا کہنا ہے کہ فریقین نے مذاکرات جاری رکھنے پر اتفاق کیا ہے تاکہ سرحدی سلامتی اور علاقائی استحکام سے متعلق باقی مسائل آئندہ دور میں حل کیے جا سکیں۔
