لکی مروت: سلطان خیل میں سیکیورٹی کارروائی، 8 خوارج ہلاک
لکی مروت کے علاقے سلطان خیل میں سیکیورٹی فورسز نے ایک بڑی کارروائی کرتے ہوئے 8 خوارج کو ہلاک کر دیا۔ یہ آپریشن 16 اکتوبر 2025 کو مصدقہ انٹیلیجنس اطلاعات کی بنیاد پر انجام دیا گیا، جس میں افغان طالبان کے پراکسی خوارج کی موجودگی کی اطلاع ملی تھی۔
آپریشن کے دوران فورسز نے فضائی اور زمینی نگرانی کے بعد دہشتگردوں کی نقل و حرکت کی نشاندہی کی اور فوری کارروائی کی۔ ہلاک شدگان کے قبضے سے بھاری مقدار میں جدید اسلحہ، گولہ بارود، خودکش جیکٹس اور مواصلاتی آلات برآمد کیے گئے۔
سیکیورٹی ذرائع کے مطابق یہ دہشتگرد حالیہ دنوں میں مختلف تخریبی کارروائیوں اور فورسز پر حملوں میں ملوث تھے۔ علاقے میں سرچ آپریشن مکمل ہونے کے بعد فضا کو کلیئر قرار دے دیا گیا ہے۔
گزشتہ چار دنوں میں لکی مروت، شمالی وزیرستان اور ٹانک کے دیگر علاقوں میں افغان طالبان کے بھیجے گئے 102 خوارج کو ہلاک کیا جا چکا ہے۔ نیشنل ایکشن پلان کے تحت سیکیورٹی فورسز کی کارروائیاں بلاامتیاز جاری ہیں۔
سیکیورٹی حکام نے عوام سے اپیل کی ہے کہ مشکوک افراد اور سرگرمیوں کی فوری اطلاع متعلقہ اداروں کو دیں تاکہ ملک دشمن عناصر کا قلع قمع کیا جا سکے۔
