پی آئی اے کا مسافروں کے لیے سفری ہدایت نامہ جاری
پاکستان انٹرنیشنل ایئرلائن (پی آئی اے) نے لاہور اور اسلام آباد میں سڑکوں کی بندش کے باعث ممکنہ پروازوں میں تاخیر کے خدشے کے پیشِ نظر مسافروں کے لیے اہم سفری ہدایات جاری کی ہیں۔
ایئرلائن کے مطابق شاہراہوں اور اندرونی سڑکوں کی بندش کی وجہ سے عملے کو ایئرپورٹ پہنچنے میں مشکلات کا سامنا ہے، جس کے باعث پروازوں کے شیڈول پر اثر پڑ سکتا ہے۔
پی آئی اے نے مسافروں سے درخواست کی ہے کہ وہ اپنی پرواز کی تازہ ترین معلومات حاصل کرنے کے لیے روانگی سے قبل ہیلپ لائن نمبر 111-786-786 پر رابطہ کریں۔
مزید کہا گیا ہے کہ مسافر اپنی پرواز کے مقررہ وقت سے کم از کم چار سے پانچ گھنٹے قبل گھر سے ایئرپورٹ کے لیے روانہ ہوں تاکہ کسی ممکنہ تاخیر یا دشواری سے بچا جا سکے۔
پی آئی اے نے اپنے معزز مسافروں سے ممکنہ زحمت پر معذرت کا اظہار کرتے ہوئے یقین دلایا ہے کہ وہ صورتِ حال کو بہتر بنانے کے لیے تمام ممکنہ اقدامات کر رہی ہے۔
