وزیرِ اعظم شہباز شریف سے آزاد کشمیر مذاکراتی کمیٹی کی ملاقات
وزیرِ اعظم محمد شہباز شریف سے آزاد کشمیر میں مذاکراتی عمل کی کامیابی کے بعد حکومتی مذاکراتی کمیٹی نے اسلام آباد میں ملاقات کی۔ ملاقات میں اسپیکر قومی اسمبلی راجہ پرویز اشرف، قمر الزماں کائرہ، مشیرِ وزیرِ اعظم رانا ثناء اللہ، وفاقی وزراء احسن اقبال، محمد اورنگزیب، سردار محمد یوسف، ڈاکٹر طارق فضل چوہدری، احد خان چیمہ اور چیئرمین یوتھ پروگرام رانا مشہود احمد خان شریک تھے۔
وزیرِ اعظم نے مذاکراتی کمیٹی کی کاوشوں کو سراہتے ہوئے کہا کہ کشمیر میں معاملات کو افہام و تفہیم کے ذریعے حل کرنا قابلِ تحسین ہے۔ انہوں نے جوائنٹ ایکشن کمیٹی کے مثبت کردار کی بھی تعریف کی، جس نے کشمیر کی ترقی اور استحکام کے لیے بالغ نظری کا مظاہرہ کیا۔
وزیرِ اعظم شہباز شریف نے کہا کہ کشمیر میں تمام معاملات خوش اسلوبی سے حل ہو چکے ہیں، اور کشمیری عوام کے تمام تحفظات کو دور کیا جائے گا۔ حکومت اپنے کشمیری بھائیوں کے مسائل کے حل کے لیے عملی اقدامات جاری رکھے گی۔
انہوں نے کہا کہ عوامی مفاد اور امن ہماری اولین ترجیح ہیں، اور آزاد کشمیر کے عوام کی خدمت جاری رہے گی۔ “ہم پہلے بھی کشمیری عوام کے حقوق کے محافظ تھے اور آئندہ بھی ان کے حقوق کے تحفظ کے لیے پرعزم رہیں گے،” وزیرِ اعظم نے عزم دہرایا۔
مزید کہا کہ کشمیری عوام کی امنگوں کے مطابق ان کی ترقی و خوشحالی کے لیے اقدامات تسلسل سے جاری رہیں گے۔