مستونگ میں بینک ڈکیتی، مسلح ملزمان 15 لاکھ 60 ہزار روپے لے اڑے
بلوچستان کے ضلع مستونگ کے مرکزی بازار میں قائم نجی بینک میں دن دہاڑے ڈکیتی کی بڑی واردات پیش آئی۔ پولیس کے مطابق 6 سے 8 مسلح افراد اچانک بینک میں داخل ہوئے، عملے کو یرغمال بنایا اور کیش کاؤنٹر سے 15 لاکھ 60 ہزار روپے لوٹ کر فرار ہوگئے۔
واردات کے دوران بازار میں بھگدڑ مچ گئی، دکانداروں نے خوف کے باعث دکانیں بند کر دیں جبکہ علاقے میں خوف و ہراس کی فضا قائم ہو گئی۔
اطلاع ملتے ہی پولیس اور سیکیورٹی فورسز کی بھاری نفری موقع پر پہنچ گئی، علاقے کو گھیرے میں لے کر شواہد اکٹھے کیے گئے۔
پولیس حکام کے مطابق واقعے کی ہر پہلو سے تحقیقات جاری ہیں اور ملزمان کی گرفتاری کے لیے کارروائیاں تیز کر دی گئی ہیں۔