عمرہ کے خواہشمند افراد کی سنی گئی، سعودی عرب کا تاریخی اعلان
ریاض (ویب ڈیسک)سعودی عرب کی وزارتِ حج و عمرہ نے ایک تاریخی اعلان کرتے ہوئے کہا ہے کہ اب مملکت میں موجود تمام اقسام کے ویزا ہولڈرز کو عمرہ ادا کرنے کی اجازت دے دی گئی ہے۔
وزارت کے مطابق یہ سہولت ذاتی، خاندانی، ای-ٹورسٹ، ورک، ٹرانزٹ اور دیگر تمام ویزوں کے حامل افراد کے لیے بھی دستیاب ہوگی، جو اب بآسانی عمرہ کے مناسک ادا کرسکیں گے۔
وزارتِ حج و عمرہ نے بتایا کہ یہ فیصلہ خادم الحرمین الشریفین شاہ سلمان بن عبدالعزیز اور ولی عہد و وزیراعظم شہزادہ محمد بن سلمان کے وژن 2030 کے تحت کیا گیا ہے، جس کا مقصد دنیا بھر کے مسلمانوں کے لیے عمرہ کے سفر کو مزید آسان، محفوظ اور روحانی طور پر اطمینان بخش بنانا ہے۔
بیان میں مزید کہا گیا کہ وزارت نے حال ہی میں “نسک” عمرہ پلیٹ فارم متعارف کرایا ہے، جہاں زائرین آن لائن پیکجز کا انتخاب کر کے الیکٹرانک عمرہ پرمٹ حاصل کرسکیں گے۔ اس پلیٹ فارم کے ذریعے زائرین اپنی سہولت کے مطابق تاریخ، وقت اور سروسز کا انتخاب کرسکیں گے، جس سے انتظامی امور میں شفافیت اور آسانی پیدا ہوگی۔
وزارت کے مطابق اس اقدام سے نہ صرف زائرین کی سہولت میں اضافہ ہوگا بلکہ حج و عمرہ کے شعبے میں خدمات کا معیار بھی مزید بلند ہوگا۔
سعودی حکومت کا کہنا ہے کہ دنیا بھر سے آنے والے مسلمانوں کو جدید سہولیات، سلامتی اور آرام دہ ماحول فراہم کرنا اس کی اولین ترجیح ہے۔
اعلامیے کے مطابق یہ فیصلہ اس عزم کی تجدید ہے کہ زائرینِ حرمین شریفین کے لیے بہترین انتظامات کیے جائیں تاکہ ان کا ایمان افروز سفر مزید بابرکت، آسان اور یادگار بن سکے۔