شہباز شریف کا دورۂ ریاض، بڑے معاشی اقدامات کا امکان
وفاقی وزیر برائے نیشنل فوڈ سیکیورٹی رانا تنویر حسین نے کہا ہے کہ گزشتہ ماہ پاکستان اور سعودی عرب کے درمیان ہونے والے تاریخی دفاعی معاہدے کے بعد اب دونوں ممالک میں اقتصادی تعاون تیزی سے آگے بڑھ رہا ہے۔
انہوں نے ’عرب نیوز‘ کو دیے گئے ایک انٹرویو میں بتایا کہ وزیراعظم شہباز شریف رواں ماہ کے آخر میں ریاض کا دورہ کریں گے، جہاں بڑے معاشی اقدامات اور مشترکہ منصوبوں کا اعلان متوقع ہے۔
سعودی عرب کی زرعی شعبے میں دلچسپی
وفاقی وزیر کے مطابق سعودی عرب پاکستانی زرعی مصنوعات، خصوصاً چاول، گوشت، مکئی، تل اور خشک اونٹنی کے دودھ میں سرمایہ کاری کا خواہاں ہے۔ لائیو اسٹاک اور کنٹریکٹ فارمنگ میں بھی تعاون پر بات چیت ہوئی ہے۔
عملی منصوبہ بندی اور ٹائم لائنز
سعودی حکام نے مختلف منصوبوں کے لیے دسمبر 2025 تک کی ٹائم لائنز مقرر کی ہیں تاکہ سرمایہ کاری کو جلد عملی شکل دی جا سکے۔
سی پیک فیز ٹو اور زرعی ترقی
رانا تنویر حسین نے کہا کہ سی پیک کے دوسرے مرحلے میں زراعت کو مرکزی حیثیت حاصل ہوگی۔ اس میں جدید زرعی ٹیکنالوجی کی منتقلی، انفراسٹرکچر اور کسانوں کی تربیت شامل ہوں گے۔
ڈیٹا سسٹم اور ٹیکنالوجی
پاکستان اس وقت بروقت اور درست زرعی ڈیٹا سے محروم ہے۔ چین کے تعاون سے سیٹلائٹ سسٹم اور جدید ڈیٹا کلیکشن ٹیکنالوجی متعارف کرائی جائے گی تاکہ پیداوار اور فوڈ سیکیورٹی کے بہتر فیصلے ممکن ہو سکیں۔
