پنجاب میں طوطوں کی رجسٹریشن لازمی، ڈیجٹل ایپ کے ذریعے فیس بھی ادا کرنا ہوگی
اسلام آباد (نیوز ڈیسک) صوبہ پنجاب میں پالتو طوطوں کی رجسٹریشن کو اب لازمی قرار دے دیا گیا ہے۔ اس مقصد کے لیے پنجاب وائلڈ لائف اینڈ پارکس ڈیپارٹمنٹ نے ایک جدید ڈیجٹل ایپلیکیشن تیار کی ہے، جس کے ذریعے طوطے آن لائن رجسٹر کیے جائیں گے۔
اس اقدام کا مقصد مقامی طوطوں کی نسل کی حفاظت، غیر قانونی تجارت پر قابو پانا اور ماحولیاتی توازن برقرار رکھنا ہے۔ کابینہ کی منظوری کے بعد چار مقامی طوطوں کی اقسام — الیگزینڈرائن، رنگ روز، سلیٹی اور پلم ہیڈڈ — کو قانونی طور پر رجسٹر کرنے کا سلسلہ شروع ہوگا۔
نئی پالیسی کے تحت طوطا پالنے والے افراد کو فی طوطا ایک ہزار روپے فیس ادا کر کے آن لائن رجسٹریشن کرانی ہوگی۔ یہ رجسٹریشن نہ صرف کمرشل بریڈرز اور دکان داروں کے لیے بلکہ گھریلو پالتو طوطوں کے لیے بھی لازمی ہوگی۔
رجسٹریشن کا عمل پنجاب وائلڈ لائف ڈیپارٹمنٹ کی ویب سائٹ پر دستیاب آن لائن پورٹل کے ذریعے کیا جائے گا، جو ایک ہفتے کے اندر فعال ہوگا۔ ایپلیکیشن میں مالک کو طوطے کی نسل، عمر اور اپنے پاس موجود طوطوں کی تعداد درج کرنی ہوگی۔ فیس ادا کرنے کے بعد مالک کو رجسٹریشن سرٹیفکیٹ اور لائسنس جاری کیا جائے گا۔ رجسٹریشن کے بغیر طوطا رکھنے پر قانونی کارروائی یا جرمانہ ہو سکتا ہے۔
محکمہ وائلڈ لائف کے مطابق، پنجاب میں طوطوں کی مقامی نسلوں کی آبادی حالیہ برسوں میں غیر قانونی تجارت، شکار اور ماحولیاتی تبدیلیوں کی وجہ سے کم ہوئی ہے۔ یہ نئی پالیسی نہ صرف تجارت کو قانونی شکل دے گی بلکہ بریڈنگ کو بھی منظم کرے گی۔
ترجمان کا کہنا ہے کہ یہ قوانین صرف مقامی نسل کے طوطوں کے لیے ہیں، جبکہ درآمدی یا غیر ملکی طوطے اس ضابطے میں شامل نہیں۔
