صدر ٹرمپ امن کے علمبردار، پاک امریکا تعلقات مزید مضبوط ہوں گے،شہباز شریف
واشنگٹن میں وائٹ ہاؤس میں ہونے والی ملاقات میں وزیراعظم شہباز شریف اور آرمی چیف فیلڈ مارشل جنرل سید عاصم منیر نے امریکی صدر ڈونلڈ ٹرمپ سے تفصیلی گفتگو کی۔ ملاقات خوشگوار اور دوستانہ ماحول میں انجام پائی۔
وزیراعظم شہباز شریف نے صدر ٹرمپ کو امن کا علمبردار قرار دیتے ہوئے کہا کہ عالمی تنازعات کے خاتمے کے لیے ان کی مخلصانہ کوششیں قابلِ تعریف ہیں۔ انہوں نے پاک بھارت سیزفائر میں صدر ٹرمپ کے جرات مندانہ اور فیصلہ کن کردار کو سراہتے ہوئے کہا کہ اس اقدام سے خطے کو ایک بڑے سانحے سے بچا لیا گیا۔
غزہ کی صورتحال پر اظہارِ خیال کرتے ہوئے وزیراعظم نے جنگ بندی کے لیے صدر ٹرمپ کی کاوشوں کو خراجِ تحسین پیش کیا۔ انہوں نے بالخصوص نیویارک میں مسلم دنیا کے رہنماؤں کو مدعو کر کے امن کے قیام کے لیے کی جانے والی مشاورت کو قابلِ ستائش قرار دیا۔
وزیراعظم نے پاکستان اور امریکا کے درمیان حالیہ ٹیرف معاہدے پر بھی صدر ٹرمپ کا شکریہ ادا کیا اور کہا کہ ان کی قیادت میں پاک امریکا دیرینہ تعلقات مزید مضبوط ہوں گے۔ ساتھ ہی انہوں نے امریکی سرمایہ کاروں کو زراعت، آئی ٹی، معدنیات اور توانائی کے شعبوں میں سرمایہ کاری کی دعوت دی۔
دونوں رہنماؤں کے درمیان خطے کی سلامتی اور انسدادِ دہشتگردی پر بھی تفصیلی بات چیت ہوئی۔ وزیراعظم نے انسدادِ دہشتگردی میں پاکستان کے کردار کو تسلیم کرنے پر صدر ٹرمپ کا شکریہ ادا کیا اور انٹیلیجنس و سکیورٹی تعاون کو مزید وسعت دینے پر زور دیا۔
ملاقات کے اختتام پر وزیراعظم شہباز شریف نے امریکی صدر ڈونلڈ ٹرمپ کو پاکستان کے سرکاری دورے کی دعوت بھی دی۔
