اسلام آباد ریڈ زون میں ڈائیورشنز، شہری متبادل راستے اختیار کریں
اسلام آباد ٹریفک پولیس نے ریڈ زون میں داخلے کے حوالے سے ٹریفک ایڈوائزری جاری کر دی ہے۔ پولیس کے مطابق لا اینڈ آرڈر کی صورتحال کے پیش نظر ایکسپریس چوک اور نادرا چوک پر ڈائیورشنز لگائی گئی ہیں، جس کے باعث ٹریفک کی روانی متاثر ہو سکتی ہے۔
ترجمان ٹریفک پولیس کے مطابق شہری ریڈ زون میں داخلے کے لیے مارگلہ روڈ، میریٹ ہوٹل اور سرینا ہوٹل کے راستے استعمال کریں۔ ڈائیورشنز کے باعث گاڑیاں سست روی کا شکار رہیں گی، اس لیے شہری دورانِ سفر 20 منٹ اضافی وقت رکھ کر نکلیں۔
چیف ٹریفک آفیسر کیپٹن (ر) حمزہ ہمایوں نے کہا کہ شہریوں کی سہولت کے لیے ٹریفک پولیس کے اہلکار مختلف مقامات پر تعینات رہیں گے اور ٹریفک کی روانی یقینی بنانے کے لیے اقدامات جاری ہیں۔
مزید برآں ترجمان نے بتایا کہ رہنمائی اور ہیلپ کے لیے شہری ہیلپ لائن 1915 پر رابطہ کر سکتے ہیں جبکہ ٹریفک پولیس کے سوشل میڈیا پلیٹ فارمز پر بھی بروقت آگاہی فراہم کی جا رہی ہے۔
