خیبر پختونخوا میں بڑی کارروائی، فتنۃ الخوارج کے 31 دہشت گرد ہلاک
خیبر پختونخوا میں سکیورٹی فورسز کی انٹیلی جنس بیسڈ کارروائیوں کے دوران فتنۃ الخوارج کے 31 دہشت گرد ہلاک ہو گئے۔
پاک فوج کے شعبہ تعلقات عامہ (آئی ایس پی آر) کے مطابق 13 اور 14 ستمبر کو ضلع لکی مروت اور بنوں میں سکیورٹی فورسز نے بھارتی سرپرستی یافتہ دہشت گرد گروہ فتنہ الخوارج کے خلاف کامیاب آپریشنز کیے۔
ضلع لکی مروت میں دہشت گردوں کی موجودگی کی اطلاع پر کارروائی کی گئی جس میں فورسز نے ٹھکانے کو مؤثر انداز میں نشانہ بنایا۔ شدید فائرنگ کے تبادلے کے بعد 14 دہشت گرد مارے گئے۔ اسی طرح ایک اور کارروائی ضلع بنوں میں کی گئی، جہاں مزید 17 خوارج کو ہلاک کر دیا گیا۔
آئی ایس پی آر کے مطابق دونوں کارروائیوں کے بعد علاقے میں کلیئرنس آپریشن جاری ہے تاکہ باقی ماندہ دہشت گردوں کا بھی خاتمہ کیا جا سکے۔ پاک فوج نے عزم دہرایا کہ بھارتی سرپرستی میں ہونے والی دہشت گردی کا مکمل صفایا کر کے ملک میں دیرپا امن قائم کیا جائے گا۔
