آج ملک کے مختلف علاقوں میں بارشیں متوقع
کراچی: محکمہ موسمیات کے مطابق بدھ کے روز ملک کے مختلف حصوں میں بارشوں کا سلسلہ جاری رہے گا۔ سندھ کے کئی اضلاع بشمول کراچی، حیدرآباد، سجاول، ٹھٹھہ، بدین، جامشورو اور دادو میں تیز ہواؤں اور گرج چمک کے ساتھ بارش کا امکان ہے۔
بلوچستان کے لسبیلہ، ساحل مکران، گوادر، خضدار، آوران، پنجگور اور کیچ میں اکثر مقامات پر بارش جبکہ بعض مقامات پر موسلا دھار بارش متوقع ہے۔
پنجاب کے بیشتر علاقے گرم اور خشک رہیں گے، تاہم راولپنڈی، مری، گلیات اور ملحقہ علاقوں میں بارش کا امکان ہے۔ خیبر پختونخوا کے ایبٹ آباد، مانسہرہ اور بٹگرام میں بارش کی پیش گوئی کی گئی ہے۔ گلگت بلتستان میں موسم خشک جبکہ کشمیر میں جزوی ابر آلودگی کے ساتھ چند مقامات پر بارش ہو سکتی ہے۔
کراچی میں مغرب سے آنے والا بارش برسانا سسٹم بدھ کے روز بھی اثرانداز رہے گا، جس کے باعث شہر کے مختلف علاقوں میں گرج چمک کے ساتھ بارش اور کہیں کہیں موسلا دھار بارش کی توقع ہے۔ ماہر موسمیات انجم نذیر ضیغم کے مطابق یہ ڈپریشن کمزور ہو کر ‘ویل مارک ایریا’ میں تبدیل ہو جائے گا اور جمعرات تک بحیرہ عرب کی جانب منتقل ہو جائے گا، جس کے بعد بارش کی شدت میں کمی آئے گی اور صرف ہلکی بارش یا بونداباندی رہنے کے امکانات ہیں۔
