اسلام آباد : ٹیلی کام سیکٹر میں لانگ ڈسٹنس انٹرنیشنل آپریٹرز ( ایل ڈی آئی ) کے کارٹیلائزیشن کیس میں مسابقتی کمیشن نے جرمانے کی مد میں تقربیاً 50 کروڑ روپے کی ریکوری کی ہے۔ جرمانے کی مد میں پاکستان ٹیلی کمیونیکیشن کمپنی لمیٹڈ (پی ٹی سی ایل) نے 45 کروڑ 80 لاکھ روپے جبکہ ایم/ایس لنک ڈاٹ نیٹ نے ساڑھے تین کروڑ روپے جمع کروائے ہیں ۔ واضح روہے ، کمپٹیشن ٹربیونل کے فیصلے کے مطابق ، ایل ڈی آئی اپریٹرز سے ، ممنوعہ ایکگرمنٹ کے دورانیے کے دوران حاصل شدہ کل ریونیوکا دو فیصد کے حساب سے جرمانے کی ریکوری کی جائے گی۔ ٹربیونل کے حکم کے تحت، دیگر ایل ڈی آئی اپریٹرز سے جرمانے کی ریکوری کا عمل جاری ہے
۔ٹیلی کام سیکٹر میں ایل ڈی آئی آپریٹرز نے ، لانگ ڈسٹنس کالز، یعنی انٹر نیشنل کالز کے لئے مل کر ایک معاہدہ کیا تھا ، جس کے تحت تمام بین الاقوامی کالز کو پی ٹی سی ایل کے کنٹرول کردہ ایک ہی گیٹ وے کے ذریعے گزارا گیا، جبکہ دیگر آپریٹرز نے اپنے گیٹ وے بند کر دئے۔ اس انتظام کے تحت کال ٹرمینیشن کے چارجز 8.8 امریکی سینٹ فی منٹ مقرر کیے گئے، جو کہ پہلے کے مقابلے میں چار گنا زیادہ تھے۔ اس معاہدے سے ٹیلی کام لانگ ڈسٹنس مارکیٹ میں مقابلہ ختم ہوگیا،
اور بیرون ملک سے کال کرنے والوں کے اخراجات بڑھ گئے جبکہ آپریٹرز کی آمدنی میں 300 فیصد سے زائد اضافہ ہوا۔مسابقتی کمیشن نے معاہدے کو غیر قانونی قرار دے کر اس میں شامل تمام آپریٹرز پر جرمانہ عائد کیا تھا۔ ایل ڈی آپریٹرز نے کمیشن کے فیصلے کو ٹریبونل میں چیلنج کیا لیکن ٹربیونل سے کمیشن کے فیصؒے کو برقرار رکھتے ہوئے ایل ڈی آئی اپریٹرز کو آئی سی ایچ کی آمدن کے 2 فیصد کے برابر سے جرمانہ 30 دن کے اندر جرمانہ ادا کرنے کا حکم دیا۔مسابقتی کمیشن کے چیئرمین ڈاکٹر کبیر سدھو نے کہا ہے کہ کمپٹیشن کے قانون پر سختی سے عمل درآمد کیا جائے گا۔ انہوں نے واضح کیا کہ اگرچہ بزنس فورمز معلومات کے تبادلے میں مثبت کردار ادا کرسکتے ہیں، لیکن انہیں قیمتوں کے تعین یا ملی بھگت کے لیے استعمال نہیں کیا جانا چاہیے۔ مزید یہ کہ انہوں نے مارکیٹ کے ناجائز استعمال، ہیرا پھیری، صارفین کے استحصال اور دیگر غیر مسابقتی اقدامات کے خلاف بھی سخت قانونی کارروائی کی جائے گی۔
