اسلام آباد/راولپنڈی میں مون سون بارشوں کے پیشِ نظر ریسکیو 1122 راولپنڈی کو ہائی الرٹ کردیا گیا ہے۔ ریسکیو اہلکار نالہ لئی، کٹاریاں، گوالمنڈی اور دیگر نشیبی علاقوں میں تعینات ہیں اور مسلسل ڈیوٹی سر انجام دے رہے ہیں۔
ترجمان ریسکیو کے مطابق شہری مون سون کے دوران احتیاطی تدابیر اختیار کریں۔ والدین کو ہدایت کی گئی ہے کہ بچوں کو نالہ لئی یا بجلی کے کھمبوں کے قریب نہ جانے دیں۔ شہری بارش کے دوران گاڑیاں کم رفتار پر چلائیں اور اربن فلڈنگ کے خدشے کی صورت میں محفوظ مقامات پر منتقل ہو جائیں۔
مزید ہدایت دی گئی ہے کہ کمزور یا خستہ حال چھتوں کے نیچے پناہ نہ لیں، ندی نالوں کو عبور کرنے سے اجتناب کریں اور شدید بارش یا بادل پھٹنے کی صورت میں سیاحتی مقامات کا رخ نہ کریں۔ کسی بھی ہنگامی صورتحال میں فوری طور پر ریسکیو ہیلپ لائن 1122 پر اطلاع دینے کی اپیل کی گئی ہے۔
