وفاقی وزیر برائے تجارت جام کمال خان نے آج ڈھاکہ میں بنگلہ دیش کے مشیر برائے صنعت عادل الرحمٰن خان سے ملاقات کی، جس میں دوطرفہ صنعتی تعاون، سرمایہ کاری اور تجارت کے فروغ کے مختلف پہلوؤں پر تبادلہ خیال کیا گیا۔
پاکستان کے ہائی کمشنر برائے بنگلہ دیش، جناب عمران حیدر بھی اس موقع پر موجود تھے۔
ملاقات کے دوران دونوں رہنماؤں نے زور دیا کہ پاکستان اور بنگلہ دیش اپنی صنعتی اور معاشی صلاحیتوں کو باہمی فائدے کے لیے استعمال کریں۔ فوڈ سکیورٹی، فوڈ ویلیو ایڈیشن، اور صنعتی ٹیکنالوجی کے تبادلے کو اہم شعبوں کے طور پر اجاگر کیا گیا۔
وفاقی وزیر تجارت جام کمال خان نے کہا کہ پاکستان بنگلہ دیش کے صنعتی شعبے میں تعاون، مشترکہ منصوبوں اور سرمایہ کاری کا خواہاں ہے اور دونوں ممالک کو مشترکہ وژن کے تحت ایسا سازگار معاشی ماحول پیدا کرنا ہوگا جو صنعتی ترقی میں مددگار ہو۔ انہوں نے بنگلہ دیش کی دواسازی، ٹیکسٹائل اور آئی ٹی سیکٹر میں نمایاں کامیابیوں کو بھی سراہا۔
بنگلہ دیشی مشیر صنعت نے اپنے ملک کی صنعتی ترقی اور بڑھتی ہوئی ضروریات پر روشنی ڈالی اور پاکستان کے ساتھ تعاون میں گہری دلچسپی کا اظہار کیا۔ انہوں نے چمڑے کی صنعت، جہاز سازی، شوگر انڈسٹری، زرعی پراسیسنگ اور ایس ایم ایز کو ممکنہ تعاون کے شعبے قرار دیا۔
ملاقات کے اختتام پر دونوں فریقین نے اس بات پر اتفاق کیا کہ دوطرفہ تجارت اور صنعتی ترقی کو مشترکہ کوششوں کے ذریعے مزید فروغ دیا جائے گا۔
