پراونشل ڈیزاسٹر مینجمنٹ اتھارٹی (پی ڈی ایم اے) نے صوبہ خیبرپختونخوا میں حالیہ بارشوں اور فلش فلڈ کے نتیجے میں ہونے والے جانی و مالی نقصانات کی ابتدائی رپورٹ جاری کردی۔
رپورٹ کے مطابق گزشتہ 48 گھنٹوں کے دوران مختلف حادثات میں مجموعی طور پر 307 افراد جاں بحق جبکہ 23 افراد زخمی ہوئے۔ جاں بحق ہونے والوں میں 279 مرد، 15 خواتین اور 13 بچے شامل ہیں، جبکہ زخمیوں میں 17 مرد، 4 خواتین اور 2 بچے شامل ہیں۔
پی ڈی ایم اے کے مطابق بارشوں اور فلش فلڈ کے باعث صوبے بھر میں اب تک 74 مکانات متاثر ہوئے، جن میں سے 63 مکانات جزوی طور پر تباہ جبکہ 11 مکمل طور پر منہدم ہوئے ہیں۔
رپورٹ میں مزید بتایا گیا ہے کہ سب سے زیادہ متاثرہ ضلع بونیر رہا جہاں اب تک 184 اموات ریکارڈ کی گئی ہیں۔ دیگر متاثرہ اضلاع میں سوات، باجوڑ، تورغر، مانسہرہ، شانگلہ اور بٹگرام شامل ہیں۔ پی ڈی ایم اے کے مطابق شدید بارشوں اور فلش فلڈ سے سب سے زیادہ متاثرہ اضلاع بونیر، باجوڑ اور بٹگرام ہیں۔
محکمہ موسمیات کے مطابق موجودہ بارشوں کا سلسلہ 21 اگست تک وقفے وقفے سے جاری رہنے کا امکان ہے۔
پی ڈی ایم اے نے بتایا کہ وزیراعلیٰ خیبرپختونخوا کی خصوصی ہدایت پر متاثرہ اضلاع کے لیے امدادی فنڈز جاری کر دیے گئے ہیں اور تمام متعلقہ اداروں کو ہدایت کی گئی ہے کہ وہ امدادی سرگرمیوں کو مزید تیز کریں۔ اس حوالے سے پی ڈی ایم اے کی ٹیمیں ضلعی انتظامیہ کے ساتھ مسلسل رابطے میں ہیں اور صورتحال پر قریبی نظر رکھی جا رہی ہے۔
مزید بتایا گیا ہے کہ پی ڈی ایم اے پہلے ہی تمام ضلعی انتظامیہ کو پیشگی مراسلے کے ذریعے احتیاطی اور حفاظتی اقدامات اٹھانے کی ہدایت کر چکا تھا۔ اب متاثرہ اضلاع میں امدادی سرگرمیوں کو تیز کرتے ہوئے متاثرین کو فوری ریلیف فراہم کرنے کی ہدایات جاری کر دی گئی ہیں۔
تمام متعلقہ اداروں کو ہدایت دی گئی ہے کہ وہ سیاحتی مقامات پر بند سڑکوں اور شاہراہوں کی بحالی کے لیے تمام وسائل بروئے کار لائیں، جبکہ سیاحوں کو موسمی صورتحال سے مسلسل آگاہ رکھنے اور احتیاطی تدابیر اختیار کرنے کی بھی تاکید کی گئی ہے۔
پی ڈی ایم اے کے مطابق اس کا ایمرجنسی آپریشن سنٹر مکمل طور پر فعال ہے اور عوام سے اپیل کی گئی ہے کہ وہ کسی بھی ناخوشگوار واقعے کی اطلاع دینے، موسمی صورتحال اور دیگر معلومات حاصل کرنے کے لیے فری ہیلپ لائن 1700 پر فوری رابطہ کریں۔
