محسن نقوی کا ایف سی بلوچستان نارتھ کا دورہ، شہداء کو خراج عقیدت
وفاقی وزیر داخلہ محسن نقوی نے فرنٹیئر کور بلوچستان نارتھ کے ہیڈ کوارٹرز کا دورہ کیا جہاں انہیں ایف سی کے چاق و چوبند دستے نے سلامی پیش کی۔ اس موقع پر آئی جی ایف سی نارتھ میجر جنرل عابد مظہر نے وفاقی وزیر کا استقبال کیا اور افسران سے تعارف کرایا۔
محسن نقوی نے یادگارِ شہداء پر حاضری دی، پھول چڑھائے، فاتحہ خوانی کی اور شہداء کی بلندی درجات کے لیے دعا کی۔ انہوں نے ایف سی کے شہداء کی قربانیوں کو خراجِ عقیدت پیش کرتے ہوئے کہا کہ یہ قربانیاں قیام امن کی تاریخ کا سنہری باب ہیں۔
دورے کے دوران میجر جنرل عابد مظہر نے وزیر داخلہ کو فورس کی تربیت، پیشہ وارانہ مہارت اور کارکردگی سے متعلق تفصیلی بریفنگ دی۔ محسن نقوی نے ایف سی بلوچستان نارتھ کی خدمات کو سراہتے ہوئے کہا کہ:
“فرنٹیئر کور بلوچستان نارتھ ایک مایہ ناز فورس ہے جس نے مادرِ وطن کے دفاع اور فتنہ الہندوستان کے عزائم ناکام بنانے میں تاریخ ساز کردار ادا کیا۔”
انہوں نے مزید کہا کہ ایف سی کے افسران اور جوانوں کی پیشہ وارانہ صلاحیت اور بہادری پر قوم کو فخر ہے، اور ان کی قربانیاں ناقابلِ فراموش ہیں۔