پاکستان ریلویز کا ڈیجیٹل انقلاب: 348 اسٹیشنز پر POS سسٹمز کا آغاز
وفاقی وزیر ریلوے، محمد حنیف عباسی کی زیر صدارت پاکستان ریلویز اور الائیڈ بینک لمیٹڈ (ABL) کے درمیان ایک اہم مفاہمتی یادداشت (MoU) پر دستخط کی تقریب اسلام آباد میں منعقد ہوئی۔ اس معاہدے کے تحت پاکستان ریلویز کے 348 ریلوے اسٹیشنوں پر جدید پوائنٹ آف سیل (POS) سسٹمز نصب کیے جائیں گے، جن کا مقصد ٹکٹنگ، ادائیگی اور مالیاتی امور کو خودکار اور شفاف بنانا ہے۔
وزیرِ ریلوے محمد حنیف عباسی نے تقریب سے خطاب کرتے ہوئے کہا کہ وزیراعظم کے ڈیجیٹل پاکستان وژن کے تحت پاکستان ریلویز کو مکمل طور پر ڈیجیٹلائز کیا جائے گا۔ انہوں نے بتایا کہ 60 دنوں میں یہ منصوبہ مکمل کر لیا جائے گا، اور مسافر کریڈٹ یا ڈیبٹ کارڈ کے ذریعے ٹکٹ خریدنے اور دیگر خدمات کی ادائیگی کر سکیں گے، جس سے نقدی پر انحصار کم ہو گا۔
انہوں نے مزید کہا کہ POS سسٹمز کی بدولت ریلوے آمدنی کی حقیقی وقت میں نگرانی ممکن ہو سکے گی، جو شفافیت اور جوابدہی کو فروغ دے گا۔ اس کے علاوہ، مالی دھوکہ دہی اور چوری کے امکانات کم ہوں گے۔
الائیڈ بینک کے مرچنٹ سروسز کے تحت ریلوے اسٹیشنوں پر فوڈ اسٹالز، کیوسکس اور دیگر چھوٹے کاروبار بھی ڈیجیٹل ادائیگیوں کو قبول کریں گے، جس سے مالی شمولیت اور کیش لیس معیشت کی ترویج ہوگی۔
یہ معاہدہ پاکستان ریلویز کی جانب سے ڈائریکٹر آئی ٹی، علی رضا اور الائیڈ بینک کے فرخ زیب خان نے دستخط کیے۔ تقریب میں پاکستان ریلویز کی اعلیٰ قیادت، بشمول چیئرمین سید مظہر علی شاہ اور CEO عامر بلوچ نے شرکت کی۔
