لاہورمیں فوجی تنصیب پر ڈرون حملہ ہواہے، آئی ایس پی آر
اسلام آباد: ڈائریکٹر جنرل آئی ایس پی آر لیفٹیننٹ جنرل احمد شریف چوہدری نے انکشاف کیا ہے کہ بھارت کی جانب سے ڈرونز بھیجنے کا سلسلہ جاری ہے، جنہیں پاک فوج مؤثر طور پر تباہ کر رہی ہے۔ڈی جی آئی ایس پی آر کے مطابق، 7 اور 8 مئی کی درمیانی شب بھارت نے ایک بار پھر فضائی حدود کی خلاف ورزی کرتے ہوئے مختلف شہروں میں “ہیروپ” ڈرونز بھیجے۔ پاک فوج نے ان میں سے 12 بھارتی ڈرونز مار گرائے۔
پریس کانفرنس میں بتایا گیا کہ لاہور کے قریب ایک فوجی تنصیب پر ڈرون حملہ ہوا جس کے نتیجے میں 4 فوجی اہلکار زخمی ہوئے اور فوجی سازوسامان کو نقصان پہنچا۔انہوں نے مزید بتایا کہ سندھ کے علاقے میانو میں ایک اور ڈرون حملے میں ایک شہری جاں بحق اور ایک زخمی ہوا، جب کہ گوجرانوالہ، چکوال، بہاولپور، اٹک اور کراچی کے اطراف بھی ڈرونز بھیجے گئے تھے۔
لیفٹیننٹ جنرل احمد شریف کا کہنا تھا کہ پاک فوج ہر قسم کی دراندازی اور جارحیت کا منہ توڑ جواب دینے کی پوری صلاحیت رکھتی ہے۔ عالمی برادری اس صورتحال کا نوٹس لے کہ بھارت نہ صرف خطے بلکہ عالمی امن کو بھی خطرے میں ڈال رہا ہے۔انہوں نے کہا کہ بھارتی دراندازیوں سے متعلق قوم اور میڈیا کو ہر پیش رفت سے بروقت آگاہ رکھا جائے گا۔
