پاکستان اور روانڈا کے درمیان بڑی بحری ڈیل کی تیاری، اہم ملاقات میں اہم فیصلے
اسلام آباد: وفاقی وزیر برائے بحری امور جنید انوار چوہدری اور روانڈا کے وزیر خارجہ اولیور جے پی ندہونگیریہی کے درمیان اہم ملاقات ہوئی، جس میں دوطرفہ بحری تعاون، تجارت اور اقتصادی تعلقات کو فروغ دینے پر تفصیلی تبادلہ خیال کیا گیا۔
ملاقات کے دوران جنید انوار چوہدری نے روانڈا کے وزیر خارجہ کو پاکستان کے سمندری راستوں کی جغرافیائی اہمیت اور خطے میں ان کے اقتصادی کردار سے آگاہ کیا۔ دونوں رہنماؤں نے پاکستان اور روانڈا کے درمیان شپنگ لائن کے قیام کے امکانات پر بھی غور کیا۔
روانڈا کے وزیر خارجہ نے پاکستان کی بندرگاہوں اور بحری ترقی کے شعبے میں دلچسپی کا اظہار کرتے ہوئے کہا کہ وہ اس میدان میں تعاون کو مزید وسعت دینا چاہتے ہیں۔
جنید انوار چوہدری نے کہا کہ پاکستان روانڈا کے ساتھ سمندری تجارت کو مستحکم بنانے کا خواہاں ہے اور دونوں ممالک کے مابین مضبوط معاشی تعلقات وقت کی اہم ضرورت ہیں۔
ملاقات کے اختتام پر دونوں رہنماؤں نے مختلف شعبہ جات میں باہمی روابط کو فروغ دینے اور دوطرفہ تعاون کو مزید مضبوط بنانے کے عزم کا اظہار کیا۔
