کوئٹہ کو ملک کا خوبصورت ترین شہر بنائینگے،وزیراعلیٰ بلوچستان
کوئٹہ (نمائندہ خصوصی) وزیر اعلیٰ بلوچستان میر سرفراز بگٹی کی زیر صدارت کوئٹہ ڈویلپمنٹ پروجیکٹ سے متعلق اہم اجلاس منعقد ہوا، جس میں جاری ترقیاتی منصوبوں کی پیش رفت اور مجوزہ منصوبوں پر تفصیلی غور کیا گیا۔
اجلاس میں کمشنر کوئٹہ حمزہ شفقات اور پروجیکٹ ڈائریکٹر رفیق بلوچ نے بریفنگ دی۔ اجلاس میں کوئٹہ کی روایتی خوبصورتی کی بحالی کے جامع پلان پر عملدرآمد کے آغاز کا اعلان کیا گیا، جبکہ گنجان آباد علاقوں میں سڑکوں کی توسیع و بیوٹیفکیشن کے نئے منصوبوں پر بھی تجاویز پیش کی گئیں۔
وزیر اعلیٰ نے ائیرپورٹ روڈ کی توسیع اور خوبصورتی کے منصوبے کا باضابطہ آغاز کرتے ہوئے ہدایت کی کہ تمام منصوبوں میں اعلیٰ معیار اور مقررہ ٹائم لائن کو ہر صورت یقینی بنایا جائے۔
انہوں نے اعلان کیا کہ روڈ کی توسیع کی زد میں آنے والے 14 کچے گھروں کے مکینوں کو تمام سہولیات سے مزین خوبصورت پکے گھر بنا کر دیے جائیں گے۔
وزیراعلیٰ نے حکم دیا کہ ائیرپورٹ روڈ بیوٹیفکیشن پروجیکٹ میں رکاوٹ بننے یا خوبصورتی خراب کرنے والے افراد کے خلاف قانونی کارروائی کی جائے، جب کہ وال چاکنگ کرنے والوں کے خلاف ایف آئی آر درج کی جائے۔
اجلاس میں صوبائی وزیر خزانہ میر شعیب نوشیروانی، مشیر بلدیات نوابزادہ بابا امیر حمزہ زہری، ایڈیشنل چیف سیکریٹری حافظ عبدالباسط، پرنسپل سیکریٹری بابر خان، سیکریٹری مواصلات لعل جان جعفر سمیت متعلقہ حکام نے شرکت کی۔
