سابق سیکرٹری خارجہ نجم الدین اے شیخ انتقال کر گئے
کراچی: پاکستان کے نامور سفارتکار اور سابق سیکرٹری خارجہ نجم الدین اے شیخ 85 سال کی عمر میں کراچی میں انتقال کر گئے۔نجم الدین اے شیخ نے 1994 سے 1997 تک سیکرٹری خارجہ کے طور پر خدمات انجام دیں اور اپنی چار دہائیوں پر مشتمل سفارتی کیریئر کے دوران جرمنی، کینیڈا، امریکا اور ایران میں بطور سفیر پاکستان کی نمائندگی کی۔
وہ جامعہ سندھ اور امریکہ کی ٹفٹس یونیورسٹی کے فلیچر اسکول آف لا اینڈ ڈپلومیسی سے فارغ التحصیل تھے اور بین الاقوامی تعاون، علاقائی استحکام اور انسانی حقوق کے سرگرم حامی تھے۔نجم الدین اے شیخ انسٹی ٹیوٹ آف اسٹریٹجک اسٹڈیز اسلام آباد کے بورڈ آف گورنرز کے رکن بھی رہے اور سندھ کونسل آف فارن ریلیشنز کے بانی اراکین میں شامل تھے۔ان کی وفات کو سفارتی حلقوں میں ایک بڑا نقصان قرار دیا جا رہا ہے۔
