کوہاٹ میں فائرنگ، دو پولیس اہلکار شہید
کوہاٹ میں نامعلوم افراد کی فائرنگ سے دو پولیس اہلکار جاں بحق ہو گئے۔تفصیلات کے مطابق، کوہاٹ کے علاقے تاندہ ڈیم کے قریب نامعلوم افراد نے فائرنگ کرکے اے ایس آئی مصطفی اور اہلکار زاہد کو جاں بحق کر دیا۔ حملہ آور واردات کے بعد فرار ہونے میں کامیاب ہوگئے۔
واقعے کی اطلاع ملتے ہی پولیس جائے وقوعہ پر پہنچ گئی اور علاقے کو گھیرے میں لے لیا۔ مقتول اہلکاروں کی لاشیں ڈی اے اسپتال کوہاٹ منتقل کر دی گئیں۔
ڈسٹرکٹ پولیس آفیسر (ڈی پی او) زاہد اللہ خان نے کہا کہ واقعے کی تحقیقات جاری ہیں۔ قتل کی وجہ دہشتگردی ہے یا ذاتی دشمنی، اس حوالے سے ابھی کچھ کہنا قبل از وقت ہوگا۔
ادھر، انسپکٹر جنرل پولیس خیبر پختونخوا ذوالفقار حمید نے کوہاٹ میں پولیس اہلکاروں کی ٹارگٹ کلنگ کا نوٹس لیتے ہوئے ایڈیشنل آئی جی سی ٹی ڈی کو خصوصی تفتیشی ٹیمیں تشکیل دینے کی ہدایت کی ہے۔
آئی جی پولیس کا کہنا تھا کہ بزدلانہ کارروائیاں پولیس فورس کے حوصلے پست نہیں کر سکتیں۔ انہوں نے عزم ظاہر کیا کہ پولیس جوانوں کا خون رائیگاں نہیں جائے گا اور دہشت گردوں کے خلاف کارروائی آخری دہشت گرد کے خاتمے تک جاری رہے گی۔
