پاکستان کو 2 ارب ڈالر کی خوشخبری! وزیراعظم کا فوری عملدرآمد کا حکم
پرائم منسٹر شہباز شریف نے آذربائیجان کیساتھ دستخط شدہ مفاہمتی یادداشتوں اور معاہدوں کو جلد عملی جامہ پہنانیکی ہدایت کی ہے۔ وزیر اعظم نے حالیہ دورہ آذربائیجان کے حوالے سے جائزہ اجلاس میں وزارت تجارت کو آذربائیجان اور پاکستان کے درمیان موجودہ تجارتی حجم کو دو ارب ڈالر تک بڑھانے کیلئے جامع لائحہ عمل پیش کرنیکی ہدایت کی ہے۔
شہبازشریف نے آذربائیجان کے صدر کیجانب سے پاکستان میں دو ارب ڈالر کی سرمایہ کاری کے اعلان پر بھی توجہ دلائی اور نائب وزیراعظم اسحاق ڈار کی زیر نگرانی ایک کمیٹی قائم کی، جو توانائی اور بنیادی ڈھانچے کے شعبوں میں معاہدوں کے لیے تیاری یقینی بنائیگی.
پرائم مسنٹر شہباز شریف نے آذربائیجان کے صدر کے آئندہ مہینے متوقع دورہ پاکستان سے قبل تمام ضروری تیاریاں مکمل کرنیکی ہدایت کی اور آذربائیجان سمیت دیگر ممالک میں ٹریڈ افسران کی تعیناتی کی سفارش بھی کی جہاں پاکستان کیساتھ تجارت کی وسیع صلاحیت موجود ہے۔
اجلاس میں شہباز شریف نے کہا کہ آذربائیجان او ر پاکستان کے درمیان دیرینہ برادرانہ تعلقات ہیں جو کئی دہائیوں پر محیط ہیں، اور پاکستان وسط ایشیائی ریاستوں کیساتھ تجارت و سرمایہ کاری کے وسیع مواقع سے بھرپور فائدہ اٹھانے کیلیے اقدامات کر رہا ہے۔ اجلاس کو بتایا گیا کہ وزیراعظم کے دورے کے دوران آذربائیجان اور پاکستان کے درمیان دو طرفہ تعاون بڑھانے کیلیے تیرہ مفاہمتی یادداشتوں اور معاہدوں پر دستخط کئے گئے تھے۔اجلاس میں نائب وزیراعظم اسحاق ڈار، جام کمال ، وفاقی وزراء احد خان چیمہ، عبدالعلیم خان، معاون خصوصی طارق فاطمی ،ڈاکٹر مصدق ملک اور دیگر اعلی حکام نے شرکت کی۔
