افریقہ-ون سب میرین کیبل کراچی پہنچنے کے لیے تیار
ڈیجیٹل پاکستان کیجانب ایک اہم پیش رفت کے طور پر تیز رفتار انٹرنیٹ کیبل پاکستان پہنچنے کیلیے تیار ہے۔افریقہ-ون سب میرین کیبل بائیس فروری 2025 کو کراچی میں پی ٹی سی ایل کے سی ویو لینڈنگ اسٹیشن پر پہنچے گی۔پی ٹی سی ایل نے جمعہ کو پی ایس ایکس کو اپنے نوٹس کے ذریعے اس پیش رفت سے آگاہ کیا۔اعلامیے میں کہا گیا کہ افریقہ-ون سب میرین کیبل کے ساتھ پاکستان کے الحاق کی تاریخی تقریب بائیس فروری 2025 کو شیڈول ہے، جھاں یہ پی ٹی سی ایل کے سی ویو، کراچی لینڈنگ سائٹ پر پہنچے گی۔
یہ پیش رفت پاکستان کی ڈیجیٹل کنیکٹیویٹی میں ایک انقلابی قدم ثابت ہوگی۔پی ٹی سی ایل نے منصوبے کا جائزہ پیش کرتے ہوئے بتایا کہ نومبر 2020 میں کمپنی کے بورڈ آف ڈائریکٹرز نے افریقہ-1 سب میرین کیبل پروجیکٹ کیلیے 5.9 کروڑ ڈالر کی سرمایہ کاری کی منظوری دی تھی۔یہ منصوبہ متحدہ عرب امارات، یورپ اور افریقہ کے درمیان کنیکٹیوٹی فراہم کرنیکے ساتھ متعدد لینڈنگ اسٹیشنز قائم کرنے کے لیے تیار کیا گیا ہے۔PTCL نے بتایا کہ اس نے 2021 سے اپنے کیپیکس کے تحت اس منصوبے میں سالانہ سرمایہ کاری کا آغاز کیا۔انھوں نے کہا کہ 2025 تک کل سرمایہ کاری کا تقریبا 75 فی صد چار سال میں مکمل ہو چکا ہے اور توقع ہے کہ رواں سال کے دوران باقی ماندہ سرمایہ کاری بھی مکمل کر لی جائیگی۔
منصوبے کی پہلی سہ ماہی 2026 میں ریڈی فار سروس (آر ایف ایس) کے مرحلے تک پہنچنے کی توقع ہے۔ RFS مکمل ہونیکے بعد افریقہ-ون سب میرین کیبل مکمل طور پر فعال ہو جائیگی اور کمپنی اس منصوبے سے آمدن حاصل کرنا شروع کردیگی جو اسکی مجموعی مالی ترقی میں مثبت کردار ادا کریگی۔یہ پیش رفت ایسے وقت میں سامنے آئی ہے جب پاکستان کو اکثر انٹرنیٹ بندش کا سامنا رہتا ہے، جسکی وجوہات میں کیبل فالٹس، حکومتی پابندیاں، اور تکنیکی مسائل شامل ہیں۔
گذشتہ ماہ پی ٹی اے کے چیئرمین میجر جنرل (ر) حفیظ الرحمٰن نے قومی اسمبلی کی قائمہ کمیٹی برائے انفارمیشن ٹیکنالوجی و ٹیلی کمیونیکیشن کو بتایا کہ ملک میں انٹرنیٹ کارکردگی بہتر بنانیکے لئے 4 نئی سب میرین کیبلز متعارف کرائی جا رہی ہیں۔دسمبر 2024 میں pta نے ایک بیان میں کہا کہ اس نے بین الاقوامی کنیکٹیویٹی کو بہتر بنانے میں ”نمایاں پیش رفت“ کی ہے، جس میں ٹرانس ورلڈ ایسوسی ایٹ (ٹی ڈبلیو اے) – جو پاکستان میں دو افریقی سب میرین کیبل کا لینڈنگ پارٹنر ہے – کی سہولت کاری شامل ہے۔
اس وقت بیان میں کہا گیا تھا کہ یہ اقدام پاکستان کے بین الاقوامی ٹیلی کمیونیکیشن انفرااسٹرکچر کو بہتر بنائیگا اور کنیکٹیویٹی میں اضافہ کریگا۔ماہرین کا ماننا ہے کہ افریقہ-ون اور دیگر آنیوالی سب میرین کیبلز کی بدولت پاکستان کا ڈیجیٹل انفرااسٹرکچر مزید مستحکم ہوگا، انٹرنیٹ کی بندش میں کمی آئیگی اور رفتار میں بہتری متوقع ہے۔
