کشمیر کیلئے جنگیں لڑیں، آئندہ بھی تیار ہیں، آرمی چیف
آرم چیف جنرل سید عاصم منیر نے کہا ہے کہ کشمیر کی خاطر تین جنگیں لڑیں، دس مزید لڑنی پڑی تو لڑینگے.آئی ایس پی آر کے مطابق سید عاصم منیر نے مظفر آباد کا دورہ کیا، جہاں انھوں نے شھدا کی قربانیوں کو خراج عقیدت پیش کیا۔ آرمی چیف جموں و کشمیر یادگار گئے اور وہاں شھدا کی یادگار پر پھولوں کی چادر چڑھائی۔ انھوں نے شھدا کی بے مثال قربانیوں کو سراہا۔آرمی چیف نے کشمیر میں جاری مشکل آپریشنل حالات میں متعین افسران اور فوجیوں کی غیر متزلزل لگن، پیشہ ورانہ برتری اور جنگی تیاری کی بھی تعریف کی۔ انھوں نے فوجیوں کی بلند حوصلہ افزائی اور چوکس نگرانی کو سراہا۔ آرمی چیف نے کہا کہ دشمن کی کسی بھی کارروائی کا مقابلہ کرنے کیلیے اعلیٰ درجے کی جنگی تیاری برقرار رکھنا ضروری ہے۔
جنرل عاصم منیر نے مسلح افواج کی جنگی تیاری پر مکمل اعتماد کا اظہار کرتے ہوئے یقین دہانی کرائی کہ کسی بھی جارحیت کا بھر پور جواب دیا جائیگا. پاک فوج مکمل عزم اور ثابت قدمی کیساتھ قوم کی حاکمیت اور سرحدی سالمیت کا دفاع کریگی۔ اپنے دورے کے دوران جنرل عاصم منیر نے کشمیر کی معروف شخصیات اور سابق فوجیوں سے بھی ملاقات کی اور غیر قانونی طور پر بھارتی زیر قبضہ جموں و کشمیر کے عوام کیلیے پاکستان کی پائیدار حمایت کا اعادہ کیا۔
عاصم منیر نے کہا کہ بھارتی مظالم اور بڑھتی ہوئی ہندوتوا انتہا پسندی کشمیر کے عوام کی خود ارادیت کی جدوجہد کو مزید تقویت دیتی ہے۔ پاکستان ہمیشہ ریاستی جبر و ظلم کیخلاف کشمیر کے عوام کے جائز اور باحق مقصد کے ساتھ کھڑا رہیگا اور یقیناً ایک دن کشمیر آزاد ہو کر، کشمیر کے عوام کی آزاد مرضی اور تقدیر کے مطابق پاکستان کا حصہ بن جائیگا. قبل ازیں مظفر آباد پہنچنے پر آرمی چیف جنرل سید عاصم منیر کا استقبال کور کمانڈر راولپنڈی نے کیا۔آرمی چیف نے مظفر آباد آزاد کشمیر کے دورے کے موقع پر کشمیری عمائدین اور ویٹرنز سے اہم خطاب بھی کیا۔
انہوں نے کہا کشمیر بنے گا پاکستان، کشمیر اور پاکستان کا رشتہ لازم و ملزوم ہے۔ کشمیر کل بھی اور آج بھی پاکستان کا حصہ تھا اور رہیگا.آرمی چیف کا کہنا تھا کہ آزادی کی شمع، کشمیریوں کی ایک پیڑھی، دوسری پیڑھی کے حوالے کرتی چلی آ رہی ہے۔ اگر ہم متحد اور مضبوط رہیں تو ہم ہر مشکل کا سامنا کر سکتے ہیں۔ اللہ تعالیٰ نے کشمیر کی سر زمین کو قدرتی حسن اور وسائل سے نوازا ہے۔ انھوں نے کہا کہ آج، کل یا پرسوں یا تھوڑے عرصے تک مقبوضہ کشمیر میں زیادتی کر سکتے ہو مگر ہمیشہ کیلیے نہیں۔کشمیر کا فیصلہ کشمیر کے عوام نے کرنا ہے، نہ کہ مقبوضہ کشمیر میں کِسی غاصب فوج نے۔ کشمیر کی خاطر 3جنگیں لڑی ہیں، دس مزید لڑنی پڑیں تو ان شا اللہ لڑینگے۔
