محمد آصف کو سارک اسنوکر چیمپئن شپ جیتنے پر 25 لاکھ انعام
پرائم منسٹر شہباز شریف کا کہنا ہے کہ پاکستانی نوجوان کھلاڑی اپنی صلاحیتوں سے پوری دنیا میں ملک و قوم کا نام روشن کر رہے ہیں۔شہباز شریف سے اسنوکر چیمپئین محمد آصف نے ملاقات کی جس دوران شہباز شریف نے محمد آصف کو حال ہی میں سری لنکا میں منعقدہ سارک اسنوکر چیمپئمن شپ جیتنے پر مبارکباد پیش کی۔شہباز شریف نے محمد آصف کو پچیس لاکھ روپے کا انعامی چیک پیش کرتے ہوئے کہا کہ آپ نے اسنوکر کی دنیا میں پاکستان کا نام روشن کیا، پوری قوم کو آپ پر فخر ہے۔
شہباز شریف نے کہا کہ تین مرتبہ ورلڈ ایمیچیور اسنوکر چیمپئمن شپ اور 3 مرتبہ سارک اسنوکر چیمپئن شپ جیت کر آپ نے دنیا بھر میں اپنی صلاحیتوں کا لوہا منوایا اور پاکستان کا نام روشن کیا۔وزیراعظم کا مزید کہنا تھا کہ حکومت، پاکستانی کھلاڑیوں کو سہولیات کی فراہمی کیلئے ہر ممکن اقدام کر رہی ہے۔محمد آصف نے وزیرِ اعظم کی جانب سے قومی سطح پر پزیرائی پر شکریہ ادا کرتے ہوئے کہا کہ حکومتی سرپرستی کھیلوں کے فروغ میں اہم کردار ادا کرتی ہے
اور میرے لئے یہ اعزاز کی بات ہے کہ وزیرِ اعظم نے میری پذیرائی کی۔وزیرِ اعظم نے متعلقہ حکام کو محمد آصف کے ساتھ مل کر ملک میں اسنوکر کے مزید کھلاڑیوں کی تربیت کیلئے اقدامات کی ہدایت جاری کی تاکہ نوجوانوں میں اس کھیل کو مزید فروغ ملے۔
