بینک فراڈ کے متاثرین کو کروڑوں روپے واپس کرنیکا حکم
صدر مملکت آصف علی زرداری کی جانب سے بینک فراڈ کے 31 متاثرین کو ریلیف فراہمی کی ہدایت کردی گئی جبکہ 6 بینکوں کو 31 متاثرین کو 24.136 ملین واپس کرنے کا حکم دیا گیا ہے۔ایوان صدر اسلام آباد کے اعلامیے کے مطابق صدر مملکت نے بینکنگ محتسب کے فیصلوں کےخلاف دائر 31 درخواستوں پر فیصلے کر دیے۔ آصف زرداری نے فراڈ متاثرین کے حق میں بینکنگ محتسب کے فیصلوں کو برقرار رکھا ہے۔اعلامیے کے مطابق فیصلے عوام کو انصاف اور فوری ریلیف فراہم کرنے کے صدر مملکت کے عزم کے عکاس ہیں۔صدر آصف زرداری نے یونائیٹڈ بینک لمیٹڈ کی 12 درخواستوں کو مسترد کردیا۔
یونائیٹڈ بینک لمیٹڈ کے 12 صارفین کو 1 کروڑ 15 لاکھ روپے جبکہ مسلم کمرشل بینک کے 10 صارفین کو 52 لاکھ روپے سے زائد رقم واپس کرنے کی ہدایت کی گئی ہے۔الائیڈ بینک لمیٹڈ کی جانب سے دائر 5 درخواستیں بھی خارج کر دی گئیں، الائیڈ بینک لمیٹڈ کو متاثرہ صارفین کو 40 لاکھ سے زائد رقم واپس کرنے کا حکم دیا گیا ہے۔بینک آف پنجاب کی دائر کردہ 3 درخواستیں بھی خارج کردی گئیں جبکہ صدر کا کہنا ہے کہ بینک آف پنجاب فراڈ سے متاثرہ 3 صارفین کو 23 لاکھ سے زائد رقم واپس کرے۔عسکری بینک لمیٹڈ کو ایک کیس میں 490,000 روپے واپس کرنے اور حبیب بینک لمیٹڈ کے کیس میں ایک صارف کو 420,000 روپے ادا کرنے کی ہدایت کی گئی ہے۔اعلامیے کے مطابق متاثرین کو نوسرباز افراد نے خود کو بینک کا نمائندہ ظاہر کرکے دھوکا دیا،
نوسرباز افراد نے دھوکا دہی پر مبنی فون کالز کے ذریعے صارفین سے بینکنگ کی حساس تفصیلات حاصل کیں۔صارفین سے ذاتی بینکنگ تفصیلات حاصل کرنے کے بعد صارفین کے اکاؤنٹس سے رقوم نکلوالیں گئیں، صارفین نے فراڈ سے ہتھیائی رقم واپس لینے کے لیے بینکوں سے رجوع کیا لیکن ریلیف نہ دیا گیا۔متاثرہ فریقوں نے ریلیف کے حصول کیلئے بینکنگ محتسب سے رجوع کیا، بینکوں نے محتسب کے فیصلوں کو چیلنج کرتے ہوئے صدر مملکت کو الگ الگ درخواستیں دائر کیں۔
اعلامیے میں بتایا گیا کہ سماعت اور متعلقہ ریکارڈ کا جائزہ لینے کے بعد حتمی فیصلے سنائے گئے۔صدر مملکت نے مالیاتی دھوکا دہی سے شہریوں کے بچاؤ میں بینکنگ محتسب کے کردار پر زور دیتے ہوئے کہا کہ بینکنگ محتسب شکایات کے فوری حل کے لیے اہم ادارہ ہے، بینکنگ محتسب طویل قانونی طریقہ کار کے بوجھ کے بغیر متاثرین کو بروقت انصاف فراہم کرتا ہے، عوام بینکنگ تنازعات ، فراڈ سے نمٹنے کے لیے بینکنگ محتسب کی خدمات سے استفادہ کریں۔
