ڈائریکٹر جنرل پی ڈی ایم اے پنجاب عرفان علی کاٹھیا نے خبردار کیا ہے کہ بھارت سے آئندہ دنوں میں 70 ہزار کیوسک سے زائد پانی آنے کا خدشہ ہے، جس سے صورتِ حال مزید سنگین ہوسکتی ہے۔
میڈیا رپورٹس کے مطابق بھارت کے مادھوپور ہیڈورکس ٹوٹنے کے باعث اضافی پانی پاکستان کی طرف بڑھ رہا ہے۔ فی الحال لاہور سیلاب کے خطرے سے محفوظ ہے تاہم قصور اور ملتان کے لیے الرٹ جاری کردیا گیا ہے۔
ڈی جی پی ڈی ایم اے کے مطابق جھنگ شہر کو بچانے کے لیے بند توڑنا پڑا جبکہ ہیڈ اسلام کو بھی اگلے 24 گھنٹوں میں خطرات لاحق ہیں۔ اس وقت گنڈا سنگھ پر پانی کا بہاؤ 3 لاکھ 3 ہزار کیوسک ہے جس کے باعث فوج اور ضلعی انتظامیہ نے 20 دیہات خالی کرائے۔
مزید بتایا گیا کہ ہیڈ سلیمانکی پر ایک لاکھ سے زائد، ہیڈ مرالہ پر ایک لاکھ 75 ہزار کیوسک پانی ریکارڈ ہوا ہے۔ دریائے راوی میں 2 لاکھ 20 ہزار کیوسک کا ریلا گزر چکا ہے، جبکہ اب بھی 1 لاکھ 29 ہزار کیوسک پانی موجود ہے۔
پی ڈی ایم اے کے مطابق بلوکی میں 2 لاکھ 11 ہزار کیوسک اور ننکانہ صاحب سے 20 ہزار کیوسک پانی شامل ہو چکا ہے۔ خطرہ ہے کہ ہیڈ محمد والا پر 7 لاکھ کیوسک کا ریلا ملتان تک پہنچے گا جہاں شگاف ڈالنے کی ضرورت پیش آ سکتی ہے۔
