ڈی جی آئی ایس پی آر لیفٹیننٹ جنرل احمد شریف چوہدری نے انکشاف کیا ہے کہ امریکی افواج کے انخلا کے دوران 7.2 بلین ڈالر مالیت کا فوجی سازوسامان افغانستان میں چھوڑا گیا, جو اب خطے کی سیکیورٹی کے لیے بڑا خطرہ بن چکا ہے۔ ان کے مطابق افغان طالبان رجیم نہ صرف پاکستان بلکہ پورے خطے اور دنیا کے لئے خطرے کی حیثیت اختیار کر چکی ہے۔
انہوں نے بتایا کہ 4 نومبر 2025 سے اب تک 4910 انٹیلی جنس بیسڈ آپریشنز کیے گئے جن میں 206 دہشتگرد ہلاک ہوئے، جبکہ رواں سال مجموعی طور پر 67023 آپریشنز میں 1873 دہشتگرد مارے گئے جن میں 136 افغان شامل ہیں۔
ترجمان پاک فوج نے کہا کہ پاک۔افغان بارڈر انتہائی مشکل جغرافیہ پر مشتمل ہے، جہاں بعض پوسٹوں کے درمیان فاصلہ 20 سے 25 کلومیٹر تک ہے۔ سرحد کے دونوں اطراف منقسم گاؤں اور مشکل رسائی کے باعث موثر کنٹرول ایک بڑا چیلنج ہے۔
انہوں نے واضح کیا کہ افغان سرحد سے دہشتگردوں کی دراندازی افغان طالبان کی مکمل سہولت کاری کے تحت ہوتی ہے۔
ان کے مطابق بارڈر سے متصل افغان علاقوں میں سیاسی، دہشتگرد اور جرائم پیشہ عناصر کا مضبوط گٹھ جوڑ موجود ہے۔ یہی نیکسس نان کسٹم پیڈ گاڑیوں کو خودکش حملوں میں استعمال کرتا ہے۔
ڈی جی آئی ایس پی آر نے کہا کہ پاکستان کا مطالبہ ہے کہ افغان طالبان دہشتگردوں کی سہولت کاری بند کریں اور ایک قابلِ تصدیق میکانزم کے تحت دوحہ معاہدے پر عمل کریں۔
انہوں نے کہا کہ یہ مؤقف غیر منطقی ہے کہ خوارج دہشتگرد “مہمان” ہیں۔ اگر وہ پاکستانی ہیں تو انہیں پاکستان کے حوالے کیا جائے۔
انہوں نے خبردار کیا کہ طالبان رجیم نے افغانستان میں Non-State Actors کو جگہ دے رکھی ہے جو پورے خطے کے لیے خطرہ ہیں، جبکہ دوحہ معاہدے میں کیے گئے وعدوں پر کوئی عمل نہیں ہوا۔ طالبان حکومت نہ تمام قومیتوں کی نمائندگی کرتی ہے اور نہ خواتین کا کوئی کردار اس نظام کا حصہ ہے، اسی لیے پاکستان کا مسئلہ افغانیوں سے نہیں بلکہ طالبان رجیم سے ہے۔
انہوں نے مزید کہا کہ خونریزی اور تجارت ساتھ ساتھ نہیں چل سکتے۔ بھارت کی قیادت خود فریبی کا شکار ہے اور “سندور آپریشن” سے متعلق بھارتی آرمی چیف کے بیانات حقائق کے منافی ہیں۔
ترجمان نے کہا کہ بیرون ملک سے چلنے والے X اکاؤنٹس پاکستان کے خلاف زہریلا بیانیہ بنا رہے ہیں، جن کے پیچھے مخالف قوتیں سرگرم ہیں۔
