وزیراعظم محمد شہباز شریف نے بحرین کے دارالحکومت منامہ میں کہا کہ بحرین میں آکر ایسا محسوس ہوا جیسے اپنے گھر آئے ہوں۔ انہوں نے بحرین کے فرمانروا اور ولی عہد کی محبت اور عزت کو ناقابل فراموش قرار دیا۔ وزیراعظم نے پاک بحرین کے دیرینہ برادرانہ تعلقات کو مزید مضبوط بنانے کے عزم کا اعادہ کیا اور کہا کہ دونوں ممالک کے باہمی احترام و اعتماد کو معاشی تعاون میں تبدیل کیا جائے گا۔
وزیراعظم نے کاروباری برادری سے خطاب میں کہا کہ مذاکرات بہترین ماحول میں ہوئے اور تعلقات مزید مستحکم ہوئے۔ انہوں نے کہا کہ پاکستان کی نوجوان آبادی دنیا میں سب سے زیادہ ہے، اور حکومت نوجوانوں کو آئی ٹی، اے آئی اور جدید مہارتوں سے لیس کرنے کو ترجیح دیتی ہے۔
شہباز شریف نے بحرینی کاروباری اداروں کے ساتھ نئے سرمایہ کاری کے مواقع پیدا کرنے پر زور دیا اور کہا کہ پاکستانی کمیونٹی بحرین میں ملک کا فخر ہیں۔ انہوں نے بتایا کہ پاکستان میں زراعت، توانائی، معدنیات، آئی ٹی اور سیاحت میں سرمایہ کاری کے وسیع مواقع موجود ہیں۔
وزیراعظم نے مزید کہا کہ پاکستان اور بحرین جی سی سی فری ٹریڈ ایگریمنٹ کے حتمی مراحل میں ہیں اور سرمایہ کاروں کو ہر ممکن سہولت فراہم کی جائے گی۔ انہوں نے مشہور قول کا حوالہ دیتے ہوئے کہا، “اگر تیزی سے جانا ہے تو اکیلے جائیں، دور جانا ہے تو مل کر چلیں۔” یہ فلسفہ دونوں ممالک کے مستقبل میں تعاون اور مشترکہ ترقی کی ضمانت ہے۔
