اے آئی وزیر حاملہ ہوگئیں
البانیا کے وزیرِاعظم ایڈی راما نے ایک دلچسپ اور انوکھا اعلان کرتے ہوئے کہا ہے کہ ملک کی مصنوعی ذہانت (AI) وزیر ’’دییلا‘‘ حاملہ ہے اور وہ 83 بچوں کو جنم دے گی — مگر یہ بچے انسان نہیں بلکہ ڈیجیٹل اسسٹنٹس ہوں گے۔
ایڈی راما نے وضاحت کی کہ یہ 83 اے آئی اسسٹنٹس پارلیمان کے ہر رکن کے ذاتی معاون کے طور پر کام کریں گے، جو ان کے لیے اجلاسوں کی ریکارڈنگ، فیصلوں کا خلاصہ اور مباحثوں کا تجزیہ فراہم کریں گے۔’دییلا‘ کا مطلب البانوی زبان میں ’’سورج‘‘ ہے۔
اسے ستمبر 2025 میں البانیا کی پہلی غیرانسانی وزیر کے طور پر مقرر کیا گیا تھا۔اس کا بنیادی مقصد سرکاری خریداری نظام کو شفاف، تیز اور بدعنوانی سے پاک بنانا ہے۔ایڈی راما نے اعلان کیا:ہم نے آج ایک تاریخی قدم اٹھایا — دییلا حاملہ ہے، اور اس کے 83 بچے ہوں گے، جو ہر پارلیمانی رکن کے لیے ذاتی AI معاون ثابت ہونگے.
اے آئی بچوں کے فرائض
ہر بچہ ایک ورچوئل پارلیمانی اسسٹنٹ ہوگا، جو اپنے رکن کے لیے:اجلاسوں کی مکمل ریکارڈنگ اور تجزیہ رکھے گا،چھوٹ جانے والی تقاریر یا فیصلوں کی اطلاع دے گا،اور موقع محل کے مطابق جوابی ردعمل کی تجویز بھی دے گا۔
وزیرِاعظم نے مزاحیہ انداز میں کہا:اگر کوئی رکن کافی پینے چلا جائے اور واپس آنا بھول جائے، تو دییلا کا بچہ اسے بتائے گا کہ اجلاس میں کیا ہوا اور اب کس کو جواب دینا ہے۔
نظام کب فعال ہوگا؟
ایڈی راما کے مطابق یہ ڈیجیٹل پارلیمانی نظام 2026 کے آخر تک مکمل طور پر فعال ہو جائے گا، جس سے شفافیت اور کارکردگی میں نمایاں بہتری آئے گی۔
دییلا ایک مکمل ڈیجیٹل ہستی ہے، جو صرف کوڈ اور پکسلز پر مبنی ہے۔
وہ جنوری 2025 سے البانیا کے e-Albania پلیٹ فارم پر شہریوں کو سرکاری خدمات فراہم کر رہی ہے۔
البانیا کا تاریخی قدم
البانیا دنیا کا پہلا ملک بن گیا ہے جس نے اپنی کابینہ میں مصنوعی ذہانت پر مبنی وزیر شامل کی۔ماہرین کے مطابق، یہ قدم نہ صرف ٹیکنالوجی کی دنیا میں ایک علامتی انقلاب ہے بلکہ ڈیجیٹل جمہوریت اور شفاف حکومت کی طرف بھی ایک بڑا قدم سمجھا جا رہا ہے۔
