اقوام متحدہ کی قراردادوں کے مطابق مسئلہ کشمیر کا حل ضروری ہے، صدر ، وزیراعظم
صدرِ مملکت آصف علی زرداری اور وزیراعظم محمد شہباز شریف نے یومِ سیاہ کشمیر کے موقع پر اپنے پیغامات میں کہا ہے کہ پاکستان کشمیری عوام کی اخلاقی، سیاسی اور سفارتی حمایت ہمیشہ جاری رکھے گا۔
صدر آصف علی زرداری نے اپنے بیان میں کہا کہ 27 اکتوبر 1947 کشمیر کی تاریخ کا سیاہ ترین دن ہے، جب بھارتی افواج نے سری نگر پر ناجائز قبضہ کیا، جو بین الاقوامی قوانین اور انصاف کے تقاضوں کی صریح خلاف ورزی تھی۔
انہوں نے کہا کہ بھارت کی 5 اگست 2019 کی غیر قانونی اور غیر اخلاقی کارروائیاں بھی اسی تسلسل کی کڑی ہیں۔ کشمیری عوام پر اجتماعی سزائیں، املاک کی تباہی اور طویل فوجی محاصرہ ناقابلِ قبول ہے۔
صدرِ مملکت نے عالمی برادری پر زور دیا کہ وہ بھارت کو انسانی حقوق کی سنگین خلاف ورزیوں پر جوابدہ ٹھہرائے اور جنوبی ایشیا میں پائیدار امن کے لیے مسئلہ کشمیر کے منصفانہ حل کو یقینی بنائے۔
وزیراعظم محمد شہباز شریف نے اپنے پیغام میں کہا کہ ہر سال 27 اکتوبر وہ دن یاد دلاتا ہے جب 78 سال قبل بھارت نے اپنی افواج سری نگر بھیج کر کشمیری عوام کے حقِ خودارادیت کو پامال کیا۔
انہوں نے کہا کہ اقوامِ متحدہ کی قراردادوں کے مطابق مسئلہ کشمیر کا پرامن حل خطے کے استحکام اور دیرپا امن کے لیے ناگزیر ہے۔
وزیراعظم نے واضح کیا کہ پاکستان عالمی سطح پر کشمیری عوام کی آواز بنتا رہے گا، اور 24 کروڑ پاکستانی اپنے کشمیری بھائیوں کے شانہ بشانہ کھڑے ہیں۔
