امریکی صدر ڈونلڈ ٹرمپ نے دعویٰ کیا ہے کہ روس اور یوکرین کے درمیان جاری جنگ کے خاتمے کے لیے معاہدہ حتمی مرحلے میں داخل ہو گیا ہے۔

وائٹ ہاؤس نے بھی اس پیش رفت کی تصدیق کرتے ہوئے کہا ہے کہ امن منصوبے کے حوالے سے اہم پیش رفت سامنے آئی ہے، تاہم کچھ حساس نکات پر مزید بات چیت ضروری ہے۔

تھینکس گیونگ کی تقریب سے خطاب میں ٹرمپ نے کہا کہ اس جنگ نے ہزاروں جانیں لی ہیں، لیکن اب امن معاہدے کے مسودے پر غیر معمولی پیش رفت ہو رہی ہے۔ ان کے مطابق انہوں نے صرف نو ماہ میں آٹھ جنگیں رکوا کر سفارتی کامیابیاں حاصل کیں، اور روس یوکرین جنگ کے خاتمے کے لیے بھی بھرپور کوشش جاری ہے۔

ٹرمپ نے بتایا کہ انہوں نے اپنے خصوصی نمائندے اسٹیو وٹکوف کو ماسکو بھیجنے کی ہدایت کی ہے تاکہ روسی صدر سے ملاقات کر کے معاہدے کے حتمی نکات طے کیے جا سکیں۔ ان کے مطابق معاہدے میں اب صرف چند اختلافی امور رہ گئے ہیں۔

چند روز قبل جنیوا میں امریکی اور یوکرینی حکام کے درمیان 28 نکاتی امن تجویز پر مذاکرات ہوئے تھے، جس کے بعد دونوں ممالک نے ایک نئے فریم ورک پر کام شروع کرنے پر اتفاق کیا تھا۔

واضح رہے کہ ٹرمپ نے یوکرین کو امن منصوبہ قبول کرنے کے لیے 27 نومبر کی ڈیڈ لائن بھی دے رکھی ہے۔