فیلڈ مارشل سید عاصم منیر نے کہا ہے کہ پاکستان کی سرزمین کا تحفظ، قومی سالمیت اور ہر شہری کی حفاظت پاک فوج کی اولین ترجیح ہے اور اس پر کسی قسم کا سمجھوتہ نہیں کیا جائے گا۔
آئی ایس پی آر کے مطابق نیشنل سیکیورٹی ورکشاپ–27 کے شرکاء نے آج جنرل ہیڈکوارٹرز کا دورہ کیا جہاں ملکی و علاقائی سیکیورٹی صورتحال پر تفصیلی بریفنگ دی گئی۔ ورکشاپ نیشنل ڈیفنس یونیورسٹی کا اہم تربیتی پروگرام ہے جس میں ارکانِ پارلیمان، سینئر سول و عسکری افسران، ماہرینِ تعلیم اور سول سوسائٹی کے نمائندے شریک ہوتے ہیں۔
شرکاء نے چیف آف آرمی اسٹاف فیلڈ مارشل سید عاصم منیر سے خصوصی نشست میں تبادلۂ خیال کیا۔ آرمی چیف نے بدلتے ہوئے علاقائی ماحول، بڑھتی جیو پولیٹیکل کشیدگی، سرحد پار دہشتگردی اور ہائبرڈ وار کے چیلنجز پر روشنی ڈالی۔
انہوں نے کہا کہ بیرونی حمایت یافتہ دہشتگردی اور معلوماتی جنگ کے باوجود پاکستان کی مسلح افواج، انٹیلی جنس ادارے اور قانون نافذ کرنے والے ادارے مکمل پیشہ ورانہ مہارت اور عزم کے ساتھ قومی سلامتی کے تحفظ کے لیے سرگرم ہیں۔
فیلڈ مارشل نے کہا کہ پاکستان ایک باوقار ملک ہے اور عالمی برادری میں اسے اس کا جائز مقام ضرور ملے گا۔ “معرکۂ حق” میں پاک افواج کی کارکردگی نے دنیا میں پاکستان کے وقار میں اضافہ کیا ہے۔
انہوں نے قومی اتحاد کو پاکستان کی اصل قوت قرار دیتے ہوئے کہا کہ ہم متحد ہو کر دشمنوں کے تمام منصوبے ناکام بنائیں گے۔ شرکاء کو اسمگلنگ، منشیات کی ترسیل، منظم جرائم اور غیر قانونی غیر ملکیوں کے خلاف جاری کارروائیوں پر بھی بریفنگ دی گئی۔
فیلڈ مارشل سید عاصم منیر نے واضح کیا کہ پائیدار امن و استحکام کے لیے وفاقی و صوبائی حکومتوں کے ساتھ ہم آہنگ قومی کوششیں ناگزیر ہیں، اور پاک فوج ملکی اداروں کے ساتھ مکمل تعاون جاری رکھے گی۔
